Салық органдары неліктен қазақстандық блогерлерді тексере бастағаны белгілі болды. Бұл туралы Мемлекеттік кірістер комитеті өкілі түсіндірді, - деп хабарлайды Massaget.kz тілшісі.
TengriTV YouTube арнасына берген сұхбатында Мемлекеттік кірістер комитеті Жеке тұлғалардың кірістерін әкімшілендіру басқармасының басшысы Дина Құсайынова салық органдарына қазақстандықтардан шағым түскенін мәлімдеді.
"Бұл жұмысты көп шағым түскеннен кейін бастадық. Азаматтардан "блогерлер сән-салтанаты келіскен өмір сүреді, алайда салық төлемейді" деген шағымдар, өтініштер түседі. "Оларды тексеріңіздер, олар осындай көлік мінеді, мынадай пәтерлерде тұрады, мынадай үйлер сатып алады" дейді. Әрине, халықта олар қанша салық төлейді деген сұрақ туындайды", - деді Дина Құсайынова.
Ол блогерлерге хабарламалар 2025 жылғы ақпанда 2022 және 2023 жылдардағы деректерді талдау нәтижесінде жіберілгенін айтты.
"Ол кезде блогерлердің кейбіреуі салық декларациясын ұсынды, кейбіреуі ұсынбады, кейбіреуі нөлдік көрсеткіштері бар салық декларациясын берді, сондықтан талдау жасап, сәйкес келмейтін тұстарды анықтадық", - деді МКК өкілі.
Көптеген блогер қайырымдылыққа, туған күндерге ақша жинағанын, туыстарына ақша аударғанын айтқан.
"Қайырымдылық туралы заң бар. Қайырымдылыққа ақша жинаған кезде уәкілетті органдарға сомасы, қайырымдылықты кім жасайтыны туралы есеп ұсынылуы қажет. Бізге осы есептер берілсе, ескеріледі. Енді басқа кірістер туралы айтайын: "қайырымдылық көмек", "демеушілік көмек" деген ұғымдар бар. Мұның бәрі де табыс ретінде көрсетілуі керек, содан кейін Салық кодексіне сәйкес түзетілуі қажет. Бұлай жасалмаса, олар қосымша салық декларациясын ұсына алады, мұның бәрі ескеріледі. Хабарламаларға 30 жұмыс күні ішінде жауап беруі керек. Бір жарым айға жуық уақыт жеткілікті", - деді Мемлекеттік кірістер комитетінің өкілі.
Қазақстандық блогерлердің сынына жауап ретінде Дина Құсайынова бұл әрекеттердің мақсаты жаза емес, мемлекеттік бюджетті толтыру екенін айтты.
"Біз мемлекеттік бюджетті толтырумен айналысамыз. Біз үшін ол блогер ме, журналист пе немесе кәсіпкер ме, бұл жағы маңызды емес. Барлығы салықты дұрыс есептеп, мемлекеттік бюджетке төлеуі керек", - деді салық органының өкілі.
Сонымен қатар, ол тексеріс "жоғарыдан келген бұйрық" деген пікірлерге қатысты былай деді:
"Хабарламалар тек ақпанда жіберілген жоқ. Бұрын да хабарламалар жіберілген. Басқа блогерлер салық декларациясын үнсіз-түнсіз толықтырды, салықтарын төледі. Егер бірдеңе дұрыс болмаса, бізге түсіндірсін, келіспейтін деректерді салыстырсын".
Еске салайық, бұған дейін қазақстандық блогерлерге 53 млрд теңге төлеуге бір ай уақыт берілді. Мемлекеттік кірістер комитеті мәліметінше, 594 адам кірісін жалпы сомасы 53,3 миллиард теңгеге төмендеткен.
Енді блогерлер нақтыланған салық есебін тапсырып, салық төлеуі керек немесе 30 жұмыс күні ішінде түсініктеме беруі қажет.
19 ақпанда ҚМА төрағасының орынбасары салық органдары тексерісті аяқтағанға және залалдың нақты мөлшерін анықтағанға дейін ведомство блогерлерге қатысты қылмыстық істі өз бетінше бастай алмайтынын мәлімдеді.
Қызықты жаңалықтар мен видеоларды көру үшін TikTok арнамызға жазылыңыз!
Ж. Қадыржанова