Қазақстандық ақын әрі журналист Серік Боқан өмірден өтті, - деп хабарлайды Massaget.kz тілшісі.
Қайғылы хабарды ақын Тоқтарәлі Таңжарық әлеуметтік желі арқылы жеткізді.
"Кешір, Секе! Ақын досымыз Серік Боқан қаза болыпты. Мына өмірде ешбір ереже мен тиымға бағынуға болмысы сай келмейтін жандар болады. Секең, Серік Боқан сондай жан еді. Ол бұл өмірдің қулық-сұмдығын үйрене алмай-ақ кетті. Басын тауға да, тасқа да ұрды. Ақыры, діннен марқадам тапты... бәлкім, таппады. Өзін көп іздеді. Өзін сыйлайтын ортаны көп іздеді. Жолы болмады. Үнемі тығырыққа тіреле берді. Өзі де менің алдымнан бір кетпелтек томар кетпейді деуші еді. Шынымен, тап-таза еді. Тез жараланғыш еді. Онысын білдірмейтін. Өзін дәлелдегісі келетін. Дәлелдей алмады. Мына қоғамда ондай бөлек мінез, өзге жаратылыс иесіне орын жоқ еді. Өзі де төгіліп: "Баяғы сол жылдар не деген ізгі едің?!" дегеніндей, ол тек балалық шағында ғана бақытты болған шығар. Жазда Алматыда әлдебір базардан кезігіп қап, телефон алмасып, хабарласып тұрып едік. Өлеңдерін сұрағам. Осы әлеуметтік желіде саған іздеу салайын дегем. Келіскен. Өлеңдерін жіберген. Әңгімелесейікші, тек әдебиет туралы деген. Менің бір өлеңімді қатты сүйіп оқығанын айтқан. Амал не, сол өлеңдері уатсаптың қуысында қалыпты. Көп өлеңі жоғалған шығар. Әй, сақтамады-ау... Рухың шат болсын, досым!” - деп жазды ол.
Еске салайық, Серік Боқан әдебиет әлеміне 2000-жылдары аяқ басты. "Жас қазақ үні" газетінде, "Үн" журналында жұмыс істеді. Кейін "Асыл арна" телеарнасында журналист болып қызмет етті.
Аптаның басты оқиғалары мен пайдалы видеоларды көру үшін YouTube арнамызға жазылыңыз