Оразаны арықтау үшін ұстауға бола ма?

Кей адамдар "ораза ұстау денсаулыққа пайдалы екен, бір ай ораза ұстасам, ішім тазарып, жақсы болып қаламын" деген оймен ораза ұстайды. Тағы біреулер "бәрі ораза ұстап жатыр, мен де бірге ұстайыншы" деп қосылады. Мұндай ниет дұрыс па? Оған Muslim.kz сұрақ-жауап айдарында жауап берді, - деп хабарлайды Massaget.kz тілшісі.

"Оразаны тек арықтау үшін немесе денсаулығым жақсарсын деп, яки көппен бірге ұстау дұрыс емес. Әуелі ниетті түзеп, бір Алланың ризалығы және парыз болғандығы үшін ұстайды. Сонда Алланың разылығын да алады, денсаулығына да оң әсері тиеді. Кез-келген құлшылықтың қабыл болуы ниетке байланысты. Себебі, Пайғамбарымыз (оған Алланың салауаты мен сәлемі болсын) хадисте: "Амалдардың барлығы ниетке байланысты", – деген. Олай болса, біздің Рамазан айында жасаған құлшылықтарымыз да ниетімізге байланысты мың құлшылыққа пара-пар болмақ. Кім қандай ғибадат жасаса да, оны шын ықыласпен орындауы тиіс. Әйтпесе, жасаған құлшылықтан еш пайда болмайды", - деп жауап берген Muslim.kz сарапшылары.

Еске салайық, биыл Ораза 23 наурызда басталды. Ораза 2023 кестесін мына жерден көре аласыздар.

Еске салайық, бұған дейін биылғы пітір садақа мөлшері белгіленгені хабарланған болатын. Пітір садақаны Рамазан айының бірінші күнінен ораза айт намазына дейін беруге болады.