Қазақстан мұсылмандары діни басқармасы (ҚМДБ) мәліметінше, қасиетті Рамазан айы 8 ақпанда басталады. Ораза айт 9 наурызға, Құрбан айт 16-18 мамыр аралығына түсіп тұр, - деп хабарлайды Massaget.kz тілшісі.
2027 жылы Рамазан айы қашан басталады?
ҚМДБ жариялаған діни мерекелер күнтізбесіне сәйкес 2027 жылы Рамазан айындағы ораза 8 ақпанда басталады. Мұсылмандар қасиетті айда ораза ұстап, құлшылық етіп, рухани жағынан тазаруға, қайырымдылық жасауға, өз-өзін тәрбиелеуге тырысады.
Рамазан айы ай күнтізбесіне байланысты 29 немесе 30 күнге созылады. Бұл уақытта исі мұсылман таң атқаннан күн батқанға дейін ішіп-жеуден тыйылып, дұға-тілек тілеп, ізгі амалдар жасауға ұмтылады.
Бұл ай Ораза айт мерекесімен аяқталады. 2027 жылы бұл мейрам 9 наурызда атап өтіледі. Десе де ҚМДБ жаңа ай көрінуіне байланысты күнтізбеге өзгерістер енгізілуі мүмкін екенін ескертті.
2027 жылғы діни мерекелер күнтізбесі:
- Бараат түні - 23 қаңтарға қараған түн.
- Рамазан айындағы ораза - 8 ақпан.
- Қадір түні - 6 наурызға қараған түн.
- Ораза айт - 9 наурыз.
- Құрбан айт - 16-18 мамыр.
2027 жылы Қадір түні қай түнге түсіп тұр?
Қадір түні немесе Ләйләтул-Қадр - Рамазан айындағы ең қасиетті түндердің бірі. 2027 жылы ол 6 наурызға қараған түнге түсіп тұр.
Ислам ілімі бойынша бұл түн Мұхаммед пайғамбарға Құранның алғашқы аяттары түсе бастаған уақытпен байланыстырылады. Мүміндер бұл түнді құлшылықпен өткізіп, Алладан кешірім сұрап, береке тілейді, жасаған іс-әрекеті туралы ой түйеді.
Қадір түні Тағдыр түні деп те аталады. Бұл түн дұға ету, тәубеге келу, қайырымдылық жасау уақыты деп саналады.
Рамазанда кімдерге ораза ұстамауға рұқсат етілген?
Ораза күндіз ішіп-жеуден тыйылуды талап етеді, алайда оны ұстау бәріне бірдей міндетті емес. Жүкті және бала емізетін әйелдер, сырқаты барлар, қарт адамдар, жеті жасқа толмаған балалар, сондай-ақ, жолаушылар оразадан босатылады.
Рамазан айында не істеуге болмайды?
Рамазан кезінде ораза ұстайтын мұсылмандар белгілі бір ережелерді сақтайды. Негізгі шектеулер таң атқаннан күн батқанға дейін күшінде болады және олар тек ішіп-жеуге емес, мінез-құлыққа да қатысты:
- Ораза кезінде мүміндер таң атқаннан күн батқанға дейін ішіп-жеуден тыйылады.
- Темекі тарту - оразаны бұзатын әрекет.
- Күндіз жыныстық қатынасқа түсу. Ораза кезінде мұндай қатынастарға таң атқаннан күн батқанға дейін тыйым салынады.
- Өтірік айту, балағаттау және жаман сөз сөйлеу. Бұл істер оразаны бұзбаса да, Рамазан айында әдеп қағидаларына қайшы келеді.
- Өсек айту және жанжал шығару. Ай бойы ұстамдылыққа, сыпайы сөйлеуге ерекше мән беріледі.
- Асты шектен тыс тұтыну және ысырапқа жол беру. Рамазан айында қанағат секілді қасиеттер дәріптеледі.
2027 жылғы діни мерекелер күнтізбесі. Сурет: ҚМДБ
Алғаш ауыз бекіткенде нені ескеру керек?
Аптаның басты оқиғалары мен пайдалы видеоларды көру үшін YouTube арнамызға жазылыңыз
Ж. Қадыржанова