Нұрлан Қоянбаев жазда неге қауын-қарбыз сатумен айналысқанын айтты

Танымал продюсер, актер Нұрлан Қоянбаев жазғы демалыста Түркістан облысында қалай қауын-қарбыз сатқаны туралы айтып берді, - деп хабарлайды Massaget.kz тілшісі.

Бұл туралы ол "Түнгі студия" бағдарламасында әріптесіне айтып берген. 

Әріптесі Нұрлан Қоянбаевты жаңа күзгі маусыммен құттықтап, жазғы демалысын қалай өткізгенін сұрады. Нұрлан Қоянбаев болса жаз бойы Түркістан облысында қауын-қарбыз сатқанын айтты. 

"Бірде жолда келе жатқанда саудагерлер "қарбызды бекерге лақтырып жатырмыз, биыл сауда жоқ" деп айтты. Оларды уайымдап, ойладым, бізде инстаграм бар, әлеуметтік желіде оқырмандарым бар, осы мүмкіндікті дұрыс пайдалану керек деп. "Қауын-қарбыз сатып алайық, саудагерлерді қолдайық" деген челлендж осылай пайда болды", - деді Нұрлан Қоянбаев. 

Сонымен қатар Нұрлан Қоянбаев күз мезгілінде қауын-қарбыз ғана емес, қызанақ та пісіп жатқанын айтып, жеміс-жидек, көкөністерді сатып алуға шақырды. 

Нұрлан Қоянбаев неге саудагерлерге көмектесіп, жарнама жасап бергенін де жасырмады. 

"Жеміс-жидекті жолдың бойындағы саудагерлерден емес, диқандардың өзінен сатып алу керек, жолдағылар алыпсатарлар деген пікір де жиі айтылды. Менің жалпы мақсатым - жеміс-жидектің жарнамасын жасау еді. Қазір түрлі чипсы, энергетикалық сусындарды бәрі жарнамалайды ғой. Олардың адам денсаулығына аса пайдасы жоқ. Еш билбордтан "қарбыз сатып алыңыз" деген жазу немесе қарбыздың суретін көрмеппін. Қауын-қарбызды жарнамалайтын ірі компания да, бұл индустрияға қаржы құятындар да жоқ екен. Менің ниетім - адамның ағзасына пайдалы қауын-қарбыз, қызанақтар энергетикалық сусын мен чипсыдан ұтылып қалмаса екен деген ой", - дейді Нұрлан Қоянбаев. 

Қызықты жаңалықтар мен видеоларды көру үшін TikTok арнамызға жазылыңыз!