Желіде мас күйінде видео жариялаған Мақпал Жүнісованы сынап жатқандар да, қолдап жатқандар да бар. Танымал блогер Серік Хасенов әлеуметтік желіде әншінің әрекетіне қатысты пікір білдірді, - деп хабарлайды Massaget.kz тілшісі.
Серік Хасенов Facebook парақшасында Мақпал Жүнісова туралы көлемді жазба жариялады.
"Мақпал Жүнісованы сөккендерге таңғаламын. Мақпал сияқты бола алмағаны үшін өмірге өкпелі адамдардың әрекеті сияқты сезіледі өзіме. Мақпал Жүнісованы әнші емес дегендердің құлағы керең не талғамдарында проблема бар. Мақпал ханымның өжеттілігіне ризамын өзім. Өмірдің небір қиянаты мен қыспағына шыдап келе жатыр. Өмірі өз аузымен айта алмайтын, ішінде өліп бара жатқан сұмдық пен шындығы бар. Өсек пен жала кімді болсын қажытады. Жүрегі нәзік әйел затына ол тіпті ауыр тиіп жатады", - деп жазған ол Мақпал Жүнісованы жақтайтынын білдіріп.
Блогер Заманбек Нұрқаділов туралы да сөз қозғады.
"Күйеуіңді атып кетіп, өлімін сенен көреді. Өнер жолыңдағы есіктер тарс жабылады. Сұлу, өнерлі, қылықты әйелдің қырықта жесір қалу қасіретін айтуда қиын. Басқан ізің аңдулы, бір ағат адым жасасаң бүкіл халық назарындасың. Мақпал ханымның қызық пен қасіретке толы тағдырының бізге мәлім сырларының өзі адамды мұңайтпай қоймайды. Ал Мақпал ханымның ішінде не болып жатқанын айтпақ түгілі, елестету қиын. Бізге беймәлім сырлары қаншама. Айта алатыны бар, айта алмайтыны бар. Бір адамның осынша жүкті арқалап алып, тағдыр жолында мойынсұнбай арпалысып келе жатқанын көріп басыңды қалай ғана имейсің?", - деді блогер жазбасында.
Серік Хасенов адамның ішіп-ішпеуі өз еркі екенін, халық өнер иесін өнері үшін ғана бағалауы керек екенін де басып айтты.
"Ішіпті дейді. Неге ішпеуі керек? Өз еркі ғой. Мақпал ханым іше түсіңіз. Сізге ұзақ ғұмыр тілеймін. Шеріңіз тарқасын. Өжет, қайсар, мінезді, нәзік, сұлу, қылықты Мақпал ханым. Сіздің ғұмыр – үлкен майдан! Содан адамдық қалыбыңызды бұзбай ұстап келе жатқан ерлігіңіздің лайықты бағасы бір күні берілер. Өнеріңіздің де, өзіңіздің де алдыңызда басымды идім!", - деп жазды ол.
Айта кетейік, мас күйінде видео жариялағаннан кейін Мақпал Жүнісова желіде қызу талқыланған видеосы үшін халықтан кешірім сұраған болатын.
Өзекті жаңалықтарды өз уақытында оқу үшін Facebook парақшамызға жазылыңыз!