«Ғасыр куәгері Айша анамызға мың алғыс!» мерейтойлық кеші өтеді

1 наурыз – Алғыс  айту  күні, 8 наурыз – Халықаралық әйелдер күні қарсаңында Қазақстан Театрлары ассоциациясының  ұйымдастыруымен 5 наурызда М.Әуезов атындағы Қазақ Мемлекеттік академиялық драма театрында сағат 18.30-да Қазақстанның  халық  әртісі, «Парасат», «Құрмет» ордендерінің иегері, 100 жастағы Айша Абдуллинаның өмірі мен шығармашылығына арналған «Ғасыр куәгері Айша анамызға мың алғыс!» атты мерейтойлық кеш өтеді.

Театр өнерінің дамуы мен болашағын өркендету, театр қайраткерлеріне қолдау таныту идеясы негізінде 2016 жылы құрылған Қазақстан театрлары ассоциациясы (ҚТА) жалпы театрларға ортақ анықталған негізгі бағыттарды жүзеге асыру мақсатын ұстанады. Қазақстан  театрлары  ассоциациясының  алғашқы  жобаларының  бірі – 1 наурыз – Алғыс айту күні және 8 наурыз – Халықаралық  әйелдер мейрамы қарсаңында  көрнекті  сахнагер, Қазақстанның халық  артісі, «Парасат» «Құрмет» орденінің иегері, 100 жастағы Айша Абдуллинаның өмірі мен шығармашылығына арналған мерейтойлық кеш ұйымдастыру болып отыр. 

А.Абдуллина өнер жолын 1933 жылы М.Әуезов атындағы қазақ драма театрында  бастаған. 1947 жылдан  бастап  алпыс бес жылға жуық өмірін Ж.Шанин атындағы Оңтүстік  Қазақстан драма  театрының сахнасында  өткізді. «Қыз Жібекте» Қыз Жібек, «Қозы Көрпеш – Баян сұлуда» Баян, «Қобыландыда» Құртқа, «Ер Тарғында» Ақжүніс, «Асауға-тұсауда» Катарина, «Отеллода» Дездемона, «Ромео-Джульеттада» леди Капулетти, «Екі мырзаға бір қызметші» қойылымында Беатриче, т.б. көркем рольдерімен көрермен көзайымына айналды. 200-ден аса сүбелі бейне жасаған актриса  14 рет Кеңес Одағы медалімен марапатталды, 1958 жылы Қазақ КСР халық артисі құрметті атағын алды.

А.Абдулина, театр өнерімен қатар  қоғамдық жұмыстарға да белсене атсалысты. Оңтүстік Қазақстан облыстық кеңесіне және екі мәрте  Шымкент қалалық кеңесіне депутаттыққа сайланып, Елбасымыз Н.Ә.Назарбаевтың екі мәрте «Алғыс хатымен» марапатталып, 1996  жылы  Президент стипендиясының иегері атанды.

Театр өнеріне өлшеусіз  еңбегі сіңген, ел мәдениеті үшін адал қызмет еткен 100 жастағы Айша анамыздың өнегелі өнері мен парасатты өмір жолы өскелең  ұрпаққа  үлгі-өнеге  екені ақиқат.

Ұлт мақтанышының ұлағатты өмірін насихаттау  «Ғасыр  куәгері  Айша анамызға  мың алғыс!»  атты  мерейтойлық  кешті ұйымдастыру  Қазақстан  Театрлары  ассоциациясының  Құрылтай съезінде  бекітілген  Жарғы  негізіндегі  басты міндеттердің  бір  тармағы  болып  табылады.