Актриса, кинопродюсер Дариға Бадықова төл туындысының екінші бөлімін жарыққа шығарды. Медиа тұлғалардың басқосуына айналған "Таптым-ау сені-2" фильмінің тұсаукесерінде уайымы жайлы айтты, - деп хабарлайды Massaget.kz тілшісі.
Дариға Бадықова "Таптым-ау сені-2" фильміне біріншісіне қарағанда аз ақша жұмсалғанын айтты. Десе де, сценарийге ерекше мән берілген. Оның сөзінше, бұл фильмде сценаристер әр әзілге терең үңіліп, ұзақ жұмыс істеген.
"Екіншінің жүгі ауыр дейді ғой қазақ. Киноны көрсеңіздер, әр әзіл өміршең стильде жазылған. Ешқайсы арзан әзіл емес. Күлкінің өзі күлу үшін болған жоқ. Егер түсінетін жан болса, оның астарын ұғып отырады. Көбі Олжастың (Олжас Абай - ред.) өзінің импровизациясы деп ұғып қалды. Бірақ әр әзіл сценаристердің идеясынан шыққан нәрсе. Тақырыпты, сценарийді өзім таңдадым", - деді ол журналист сауалына берген жауабында.
Сонымен қоса, "Таптым-ау сені-2" фильмімен қатар Голливудтың "Моана" мультфильмінің де екінші бөлімі көрерменге жол тартты. Қос туындының тұсаукесері қатар келуін Дариға Бадықова қалай қабылдады?
"Кавказ халқын алсақ, олар өздерінің шығарған дүниесіне барады. Түріктер де өздерін қолдайды. Енді біз қазақтардың сыналатын уақытына келіп тұрмыз. Себебі осы жолы Голливуд пен Қазақстанның текетіресі болады. Біздің аудитория, көрермендер үлкен қаржыны көтере алатын деңгейде ғой. Сондықтан да, бір Құдай біледі. Мен Құдай емеспін ғой. Ештеңені былай болады деп алдын ала болжап айта алмаймын. Бір миллиард жинаймын, екі миллиард жинаймын деп айта алмаймын. Құдай абырой берсін. Әрине, қорқыныш бар. Бұл менталды комедия. Әр отбасында болып жатқан жағдайды картиналадық. Өзімнің арманым - осы. Ұшақ ұшырып, парашют құлатқым келмейді. Қазақтың менталды комедияларын түсіргім келеді", - деді ол.
Дариға Бадықова - қазақстандық актриса, продюсер және әнші. Ол 1985 жылы 1 желтоқсанда Жамбыл облысының Мойынқұм ауылында дүниеге келген. Т. Жүргенов атындағы Қазақ ұлттық өнер академиясын "Музыкалық драма және режиссура" мамандығы бойынша тәмамдаған. Өзінің актерлік мансабын театр сахнасынан бастап, кейін кино саласында танылды.
Айта кетейік, бір жыл бұрын Дариға Бадықованың тырнақалды туындысы жарық көріп, ең кассалы фильм ретінде танылған еді. Кейін актер Олжас Абайдың "Тастаймын-ау сені" кинокартинасында өнер көрсеткен болатын.
Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!