Жыныстық жолмен берілетін аурулар: дәрігерлер маңызды ескерту жасады

Жыныстық жолмен берілетін инфекциялар туралы неғұрлым көп білсеңіз, өзіңізді де, жақындарыңызды да қорғай аласыз, - деп хабарлайды Massaget.kz тілшісі.

ЖЖБИ деген не?

Бұл - қорғаныссыз жыныстық қатынас кезінде немесе қан арқылы, анадан балаға жұғатын инфекциялар. Олардың қатарына АИТВ, мерез, хламидиоз, адам папилломасы вирусы, В гепатиті, герпес және басқалары жатады.

Олар қаншалық қауіпті?

ЖЖБИ-дың ұзақ уақыт бойы ешқандай белгілері білінбейді. Бірақ салдары өте ауыр болуы мүмкін:

• бедеулік, белсіздік;
• созылмалы қабынулар;
• жүктілік кезіндегі асқынулар;
• онкологиялық аурулар (мысалы жатыр мойны обыры);
• АИТВ берілуі.

Мына симптомдар пайда болса, сақ болған жөн:

• несеп шығарғанда ашу, қышу, ауырсыну;
• жыныс мүшелерінде жара, бөртпе, т.с.с.

"Егер осындай белгілердің бірін байқаған болсаңыз, міндетті түрде және мүмкіндігінше тезірек дәрігерге (гинекологқа, урологқа, дерматовенерологқа) жүгініңіз", - деп ескертті мамандар.

Қалай қорғануға болады?

• тұрақты түрде тексерістен өтіп тұрыңыз;
• бөгде ине, шприц, жеке гигиена заттарын пайдаланбаңыз;
• В гепатиті мен АПВ-ға қарсы екпе алыңыз.

"Егер диагноз расталса, міндетті түрде емделу қажет. Емді екі адам да қабылдауға тиіс. Емді үзуге болмайды. Емделген соң міндетті түрде қайтадан тексерілу қажет. Жасөспірімдер мен жастар - осал топ. Көбіне олар қайда жүгінерін, кімге сенетінін білмейді. Мұндай жағдайларда емханалар жанынан ашылған Жастар денсаулығы орталықтарына баруға болады. Мұнда құпия сақтала отырып, тегін консультация алуға болады", - деді ДСМ өкілдері қазақстандықтарға.

Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!