Алматы онкологиялық орталығының онкогинекология бөлімінің меңгерушісі Райхан Болатбекова ӨКҚ баспасөз конференциясында жатыр мойны қатерлі ісігі статистикаcын ұсынды, - деп хабарлайды Massaget.kz тілшісі.
Статистика қандай?
Адам папилломасы вирусы - жатыр мойны қатерлі ісігін, ерлер мен әйелдердің сыртқы жыныс мүшелерінің қатерлі ісігін, ауыз қуысының қатерлі ісігін және аногенитальды сүйелдерді тудыратын инфекция. Ол вирустардың 200 түрінің тобына кіреді, олардың 14 түрі онкогенді деп танылады.
Халықаралық қатерлі ісіктерді зерттеу агенттігінің (IAIR) мәліметтері бойынша 2022 жылы әлемде жатыр мойны обырының 662 301 жаңа жағдайы тіркелген және 348 874 адам қайтыс болған.
Райхан Болатбекованың айтуынша, Қазақстанда жыл сайын жатыр мойны обырының 1900-ден аса жаңа жағдайы тіркеледі және 500-ге жуық әйел осы аурудан қайтыс болады.
"Жатыр мойны обыры Қазақстанда әйелдер арасында онкологиялық аурулар бойынша екінші орында тұр. Сондықтан профилактикаға ерекше көңіл бөлеміз", - деді ол.
2024 жылы қыркүйекте Қазақстанда ата-анасының келісімімен 11-13 жастағы қыздарды вакциналау бағдарламасы басталды. Бүгінгі таңда елімізде 124 мыңнан аса қыз бала вакцинацияланған.
"Вакцинация АПВ жұқтырғанға дейін де иммундық қорғаныс жасауға мүмкіндік береді. Бұл - жатыр мойны обырынан болатын сырқаттанушылық пен өлім-жітімді төмендетудің нақты қадамы", - деді онкогинекология бөлімінің меңгерушісі.
Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!
Ж. Қадыржанова