Хюгге: Үйде жалғыз қалып, сүйікті іспен айналысу психикаға қалай әсер етеді?

World Happiness Report рейтингі бойынша Дания, Норвегия, Исландия, Финляндия, Швеция сынды Скандинавия елдері ең бақытты елдер екен.

Заманауи өмір сүру трендтерінің солардың тікелей ықпалымен жүруі де осыған байланысты болса керек. Өткен жолы аталған елдерге тән "хюгге" ұғымы туралы айтқан едік.

Жалпы, «Хюгге» сөзінің нақты аудармасы жоқ. Негізгі мағынасы «жайлылық» («уют») дегенге саяды. Сөз алғаш норвег тілінен енген және «ауқаттылық», «дәулет», «молшылық» деген мағынада қолданылған. «Хюгге» — үйлесімді интерьер, жылы атмосфера, барша туған-туыспен бірге өмірдің әдемі сәттерінен ләззат алу. Әрине, бұл біздің халыққа да жат әдет емес, бірақ, нақты осы феноменнің ерекшелігі – айрықша жылы тыныштыққа бейім болуы.

Дания халқының  түсінігі бойынша, «хюгге» маусымының шарықтаған шағы жаңа жылмен сәйкес келеді. Үйде үйлесімді атмосфера пайда болып, барлығының басы қосылатын кез.

Осы секілді Финляндия елі де Даниядан қалыс қалмай, өздерінің өмір сүру салтына сай "калсарикяннит" ұғымын кең қолданысқа енгізді. Бұл ұғым "үйде жалғыз қалып, ешқайда шықпай, сүйікті ісіңмен айналысу" деген мағына береді.

"Хюгге", "Лагом", "Сису", Gluggavedur. Бұл сөздердің барлығы да 2017 жылдың басында үлкен қолданысқа ие болды. Goodbye hygge. Hello sisu: the new Scandi trends атты мақалада журналистер алдағы жылда көп қолданылатын сөздер тізімін жасаған. Бұл жолы да өткен жылғыдай скандинавиялық өмір сүру салтына тән сөздер алдыңғы қатардан табылды.

Бүгінде "калсарикяннит" сөзінің танымал болуы Финляндия елінің Сыртқы Істер министрінің тікелей ықпалымен жасалған эмодзилардың пайда болуымен байланысты. Бұл эмодзилар басқа тілде баламасы жоқ реалийлерді түсіндіру мақсатында жасалған екен.

Кейде сіз де үйде жалғыз қалып, ешқайда шықпай, сүйікті ісіңізбен айналысуды жөн санайсыз ба? Сондай күндерді қандай іске арнайсыз?