Алматы Онкологиялық орталығының онкогинекология бөлімшесінің меңгерушісі Райхан Болатбекованың айтуынша, Қазақстанда жыл сайын 2 мыңнан астам әйел жатыр мойны қатерлі ісігімен тіркеледі және 600 әйел осы аурудан көз жұмады, - деп хабарлайды Massaget.kz тілшісі.
Қаңтар - көптеген елдерде жатыр мойны обыры туралы хабардар болу айы. Жатыр мойны қатерлі ісігі әлеуметтік маңызды аурулардың ішіне кіреді. Өйткені оған көбіне жас әйелдер, соның ішінде 40-44 жастағы әйелдер шалдығады.
Алматының Өңірлік коммуникациялар қызметінің брифингінде онкогинеколог Райхан Болатбекова жатыр мойны қатерлі ісігін ерте анықтаса және ерте емді бастап кетсе, одан жазылып шығу мүмкіндігі жоғары болатынын айтты.
"Жатыр мойны қатерлі ісігі бір күнде емес, біртіндеп дамиды. Адам папилломасы вирусын жұқтырып алу мен жатыр мойны қатерлі ісігінің дамуының арасында 10-15 жыл өтуі мүмкін. Әрине, қатерлі ісік дамығанға дейін әйелдерде ешқандай шағым болмайды. Жатыр мойнында қатерлі ісік пайда болған кезде ғана қандай да бір шағымдар пайда бола бастайды. Оның белгілеріне жыныстық жолдардан қандай да бір аномаль бөліністердің шығуы, іш астының ауыруы, белінің ауыруы жатады. Мұндай белгілер кезде әйел жедел дәрігерге көріну керек", - деді дәрігер.
Маман дәрігерге жүйелі түрде көріну жатыр мойны қатерлі ісігінің қаупін азайтатынын ескертті.
"Егер әйел адам ең болмағанда жылына бір рет гинекологқа қаралып тұрса, маман қатерлі ісіктің дамып кетуіне жол бермейді", - дейді Райхан Болатбекова
Еске салайық, Қазақстанда жатыр мойны қатерлі ісігін алдын алу үшін 2024 жылы қыркүйектен бастап 11 жастағы қыздарды адам папилломасы вирусына қарсы жоспарлы түрде вакцинациялау басталды.
Instagram парақшамызға жазылып, ең қызықты ақпараттарды бірінші болып оқыңыз!
А. Жапатова