Туристерге арналған ғарыш кемесі құрастырылды

Туристерге арналған ғарыш кемесі құрастырылды

Инженерлер туристерді ғарыштық сапарға жеткізетін реактивті зымыранды құрастыруды аяқтады. Жаңа ғарыш кемесімен саяхаттау үшін ерікті туристің 95 мың АҚШ доллары болуы тиіс. XCOR Lynx атты аппаратпен ұшатын қызыққұмар саяхатшылар Жерді теңіз деңгейінен 100 шақырым биіктікте тамашалайтын болады.

Құрастырушы компанияның хабарлауынша, XCOR Lynx кемесі соңғы сынақтан сәтті өткен. Жуырда XCOR аналогы болатын SpaceShipTwo ғарыш кемесі сәтсіздікке ұшыраған болса да, инженерлер жаңа жобаны 2016 жылға қарай жүзеге асырмақ.

XCOR Aerospace компаниясы қазіргі күнге дейін 200-ден астам билетті сатып үлгерген. Себебі туристердің ғарыш сапарына қызығушылығы артып келеді. Сондай-ақ, компания басшылары жаңа туристік бағыттың ғарышты игеруге үлкен септігін тигізетіне сеніммен қарап отыр.

«Ғарышты игерудің баяу дамуына шығынның өте көп болуы түрткі болады. Дегенмен туризмнің жаңа бағытын дамыту үшін біз ғарышқа ұшу бағасын орта деңгейге жеткізуіміз керек», - дейді XCOR Aerospace компаниясының атқарушы директоры Джефф Грисон.

XCOR Lynx сарапшыларының айтуынша, ғарыш кемесі 30-50 минут атмосфераның сыртқы қабатында айналады. Кеме қозғалтқыш іске қосылғаннан кейін 35 секундта 50 шақырымға көтеріліп үлгереді екен.

Кеменің ұшу траекториясы

Белгіленген биіктікке жеткеннен кейін туристердің салмақсыздықты сезінуі үшін ғарыш кемесінің қозғалтқышы өшіріледі. Сосын XCOR Lynx тағы жиырма минут дегенде Жердің ауа қабатын жарып түседі.

Жоспарға орай, XCOR Lynx күніне төрт рет көкке көтерілетін болады. Оның ішіне тек екі адам ғана отыра алады. Бірі ұшқыш болса, бірі шамасы көтеретін турист болмақ.

XCOR Aerospace компаниясы аталған өнімнің үш нұсқасын құрастыруды жоспарлаған. Бірінші прототип Mark I деп аталып, келесі жылы тәжірибе жүзінде сынақтан өтуге қолданылады. Келесі Mark II және Mark III нұсқалары  2016 жылы туристердің қызметіне қойылмақ.

Ескере кеткен жөн, ғарыш кемесімен ұшуға бел бұған туристердің денсаулығы талапқа сай болуы керек. Инженерлердің айтуынша, америкалық төбешіктерде ұшқан кез келген адам суборбиталды кеменің қысымына да шыдай алады екен.

Сурет: xcor.com

Ж. Өрісбай