Мәзір: Көкөніс бәліші

27 сәуір 2012, 17:03

Кейде кешкісін ерекше бір тағам жегіміз келіп тұрғанда, тоңазытқыштың ішінде тек ең керек деген азық-түліктер ғана тұрады. Тез әрі оңай жасалынатын, сонымен қатар, әр ас үйден табылатын заттардан әзірленетін мына бәліш сондай кезде таптырмас мәзір.

	Құрамы: жұмыртқа - 2 дана; тұз - 1 шай қасық; айран - 1 стақан; сұйық май - 1/3 стақан; ұн - 1,5-2 стақан; қамыр қопартқышы - 1 шай қасық; картоп - 3 дана; сәбіз - 2 дана; майонез - 2 ас қасық;
	Жұмыртқаны тұзбен араластырыңыз.
	Жұмыртқаға айран, сұйық май қосып, жақсылап араластырыңыз.
	Үстінен ұн мен қамыр қопартқышын қосып, қамыр илеңіз. Қамырыңыз қолға жабысатын, қою да, сұйық та емес болуы керек.
	Картопты майда текшелерге тураңыз.
	Сәбізді де дәл солай етіп майдалаңыз.
	Көкөністерді майонезбен араластырыңыз.
	Көкөністерді қамырға қосып, жақсылап араластырыңыз.
	Май жағылған пішінге қамырды біркелкі, жұқа қылып орналастырыңыз. 180-200 градусқа ысытылған пешке салыңыз.
	40-50 минуттан кейін бәлішті тексеріп көріңіз. Беті сарғайып жатса, пісті деген сөз.
	Көкөніс бәліші дайын. Ас болсын!

С. А