Баз Лурманн Кэри Маллиганға Дейзидың рөлін ұсынған кезде ол «Бұл менің өмірімдегі ең керемет күн!» деп айғайлап жіберіпті. Сонымен қатар, Маллиган бұл романды фильмнің түсіріліміне аз ғана уақыт қалған кезде оқып шыққанын мойындаған. Ол бас кейіпкерге былай сипаттама берген: «Дейзи сондай ашық, көбік сияқты, сондай жеңіл, дәл сондай бос, оның мына әлемге айтары жоқ».
Дейзи рөліне алғашқы кезде Аманда Сейфрид, Рэйчел МакАдамс, Кира Найтли, Блейк Лайвли, Эбби Корниш, Натали Портман, Ева Грин, Оливия Уайлд, Джессика Альба және Скарлетт Йоханссон сияқты актерлер таласқан көрінеді.
Кэри Маллиган «Ұлы Гэтсби» фильмінің түсірілімінде
«Ұлы Гэтсби» романының авторы, американдық жазушы Фрэнсис Скотт Фицджеральд Дейзидің рөлін өз әйелі Зельданың сипатымен жасаған. Жұп дәл фильмдегідей жоғары санатты адамдар қатарына кірген. Фильмдегідей оларды да кештерге шақырған, ал шақырмаған жерге олар бармаған екен. Дәл фильмдегідей олардың да сүйкімі мен құрметі асыпты.
Зельда да актерлер секілді немесе танымал жұлдыздар секілді тентектіктер жасап тұрған: мәселен, Зельда суға түсу киімін киюге ерініп бірде бассейнге киімсіз жалаңаш түрде секіріп кеткен-мыс. Ал бірде Нью-Йорк қаласында такси ішінде ыстықтағаннан Зельда мен Фрэнсис көліктің үстіне жайғасып алған көрінеді. Әйелінің мұндай қасиеттерін күйеуі оғаш көрмей, оның орнына жұбайының сұлулығына тамсанумен өтіпті.
Фрэнсис Скотт Фицджеральд және оның әйелі Зельда Сейр сол кездің өзінде ел құлағын шулатып жүретін жұп болуға арнайы жаралғандай еді. Олар әрқашан қызық өмір мен керемет сәттер үшін және іш пыспас үшін бәрін де жасаған.
Кэри Маллиган Prada көйлегімен («Ұлы Гэтсби» фильмінің кадры)
«Ұлы Гэтсби» фильмінің кейіпкерлері киген барлық киімдерді Миучча Прада арнайы тігіп берген. Prada сән үйінің директоры Prada мен Miu Miu мұрағаттарынан алынған 40-қа таяу киім үлгісін жасап шыққан. Оның үстіне 1920 жылға орай тағылатын, киілетін қосымша акссесуарлар мен заттарды жасап шығыпты.
Фильмде түскен ер адамдардың киімі Brooks Brothers тігін үйінде дайындалыпты.
Ал әйел адамдардың сәнді әшекейлерін Tiffany&Co. зергерлері жасаған. Картинаның бас дизайнері Кэтрин Мартин де оларға көмектесіпті.
«Ұлы Гэтсбидың» музыкалық әрлеуін Ферджи, Florence + The Machine, Джек Уайт, Will.i.am және Эмели Санде секілді танымал тұлғалар орындаған. Ал басты композиция – Лана Дель Рейдың Young and Beautiful әні болған. Әннің орындаушы продюсері Jay-Z екен.
Фильмнің басты қаһарманы, сырлы көрші әрі қонақжай магнат Джей Гэтсбидің рөлін Баз Лурманның шешімі бойынша Леонардо ДиКаприо ойнаған.
Баз Лурманның «Ұлы Гэтсбиі» романның тұңғыш экранизациясы емес. Роман мотивімен алғаш фильм 1926 жылы түсірілген. Бірақ бұл фильмнен бізге жеткені тек – постер мен бірнеше кадр болып отыр.
«Ұлы Гэтсбиді» екінші рет 1949 жылы қайта түсірді. Paramount студиясының түсірген фильмі өте сәтсіз шығып, сыншылар мен көрерменнің үдесінен шыға алмады. Сәтсіз картинада Дейзидың рөлін Бетти Филд (ал бастапқы кезде рөлді Джин Тирни сомдайды делінген болатын) сомдаған.
«Ұлы Гэтсби» фильмінің 1949 жылы түсірілген нұсқасының кадры
«Ұлы Гэтсби» 1974 жылы ғана романның сәтті киноадаптациясы бола алды. Фильм сценариін жазған Фрэнсис Форд Кополла мен актерлер Миа Фэрро мен Роберт Редфорд көрермен көзайымына айналған болатын.
Миа Фэрроу мен Роберт Редфорд (1974 жылғы нұсқа)
Ал 2000 жылы «Ұлы Гэтсби» телефильмге айналды. Себебі жұмысты қолына BBC студиясы алған еді. Фильмдегі барлық элемент те сол ғасырға жатқызылған болатын. Тек бас кейіпкердің шаш үлгісі ғана өзгерген: джаз ғасырында ешкім де бұлай жүрмеген-тін.
Мира Сорвино Дейзи рөлінде (2000 жылғы нұсқа кадры)
Франциялық дизайнер Олимпия Ле-Тан кітап бетін қаттап, сәнмен өмір сүретін әйелдерге «Ұлы Гэтсбидың» арнайы нұсқасын шығарыпты.
Арнайы қатталған кітап – Kate Spade
Әйелдер сөмкесі – Olympia Le-Tan
Кэри Маллиган мен Леонардо ДиКаприо («Ұлы Гэтсби» фильмінің кадры)
Леонардо ДиКаприо («Ұлы Гэтсби» фильмінің кадры)
«Ұлы Гэтсби» фильмінің постері
«Ұлы Гэтсби» фильмінің постері
Қосымша мәлімет:
Том Бьюкененнің рөліне алғашқыда Бен Аффлек қарастырылған екен. Рөлге Люк Эванс пен Брэдли Купер де кандидаттығын ұсынған көрінеді. Нәтижесінде рөл Джоэл Эдгертонға бұйырған. Ал фильм көрсетілмей тұрып Джордан Бейкердың рөліне Хейли Атвел кіріседі делінген болатын. Бірақ олай болмай қалды. Бейонсе фильм үшін арнайы Эми Вайнтхаустың Back To Black әнін орындаған. Түсірілімдер Сиднейде болған.
Дайындаған: Ардақ Құлтай
Сурет: tatler.ru