Қазақ киносы тағы бір шығармамен толығады. Шәкен Айманов атындағы «Қазақфильм» студиясында жаңа фильмнің түсірілімі өтуде. Жас режиссер Ербол Жұмағұлов көзі қарақты көрермен назарына «Кітап» атты алғашқы кино туындысын ұсынбақшы.
«Кітап» фильмі мен режиссердің өмірі тығыз байланысты. Ербол Жұмағұлов кітапсыз өз өмірін елестете алмайды. Қолынан кітап түспейтін жан өзі де қалам тербетіп, кітап шығарған. Ендігі кезекте кітапты арқау етіп, фильм түсіруде. Алайда, фильм жай кітап туралы емес. Құран-Кәрім сияқты алып кітап жайлы. Есесіне фильмде дін, рух, сенім туралы сөз қозғалмақ.
Юлия Зимина
Фильмде басты рөлдерді белгілі Ресей актрисасы әрі тележүргізушісі Юлия Зимина мен отандық кино мен театр жұлдызы Берік Айтжанов сомдайды.
Оқиға желісі бойынша Берік Айтжановтың кейіпкері Оңғар белді азамат, жарнама агенттігінің директоры. Ол өмірдің мәнін ұғынуға ұмтылады, бірталай сұрақтардың жауабын іздестіруге талпынады. Кімге бөгет жасадым, кімге залалым тиген деп ойлайды. Көп ұзамай ол дінге бет бұрады. Иман келтірген соң, ол осы кезеңге дейін мазалаған сансыз ой мен жұмбақтың шешімін табады. Ал актриса Юлия Зимина оның ғашығы Зинаның бейнесін сомдайды.
Ербол Жұмағұлов
Режиссер әрі журналист-ақын Ербол Жұмағұловтың айтуы бойынша, қазіргі таңда дін мәселесі көбірек талқылануда, ал сенім жайлы сөз аса қозғалмайды. Сенім әлсіреген тұста, адамның рухы әлсірейді деген пікірде. Ол фильм сценарийін бір жарым жыл жазған екен. Режиссер фильм көркемдік шығарма болмағандықтан, көпшіліктің көңілінен шықпауы мүмкін деп болжамдайды. Ең бастысы, фильмді көрген жан «Мен кіммін?» деген сұраққа жауап табуға асығуы керек.
Түсірілім жұмыстары маусым айының аяғында басталып, тамыз айының соңына дейін жалғасатын болатын. Түсіруші топ дайын өнімді 2013 жылдың наурыз айында көгілдір экраннан көрсетуді жоспарлауда. Фильм бюджеті 1 миллион АҚШ долларын құрайды. Фильмді белгілі сазгер Қуат Шілдебаевтың музыкасы көркемдейтін болады.
Дайындаған: Ғазиза Ұзақ
Суреттер: kazakhfilmstudios.kz