Қазақстан Айка фильмін Оскар жүлдесіне үміткер ретінде ұсынуға рұқсат ала алмады, - деп хабарлайды Tengrinews.kz тілшісі. Бұл туралы ҚР мәдениет және спорт министрі Арыстанбек Мұхамедиұлы мәлімдеді. - Сергей Дворцевой Қазақстанда туып-өскен. Алайда ол өкінішке қарай, Ресей азаматтығын алған. Бас продюсерлердің бірі Қазақстан азаматы Гүлнар Сәрсенова, сонымен қатар фильмде Самал Еслямова түскен. Сол себепті бізфильмді қазақстандық дей аламыз. Біз Оскар жүлдесіне ұсынғанымызда өнімнің талап бойынша 50 пайызы біздікі болуы керектігін айтып, рұқсат бермеді, - деді министр. Арыстанбек Мұхамедиұлы бұл халықаралық тәжірибе екенін және осыны дамыту қажеттілігін айтты. Бұл мәселеде халықаралық талаптар өз ықпалын тигізген, яғни фильмдегі актерлардың 50 пайыздан көбі өндіруші елдің азаматтығында болуы тиіс екен. Айта кетейік, биыл мамырда қазақстандық әртіс Самал Еслямова 71-ші Канн кинофестивалінде үздік актриса атанған еді. Айка фильмі Қырғызстаннан келген жас қыздың оқиғасын баяндайды. Ол Мәскеуге заңсыз келіп, жұмыс істеп жүреді. Бір күндері ол жүкті болып, баланы перзентханаға тастап кетеді. Алайда уақыт өте келе ана сезімі оянып, Айка өз тастанды баласын іздей бастайды.