Ұстаздар есірткіге қарсы
![Ұстаздар есірткіге қарсы](/userdata/blogs/blogs_26732/image_l.jpg)
блог
Ұстаздар есірткіге қарсы
«Ұстаздар есірткіге қарсы!» Қоғам байлығы - адам, адам байлығы – денсаулық дейміз. Сол үшін де өмірді даналық ұшқыр қиялмен бағалайтын ата-бабаларымыз «ақ жаулық» пен «он саулықтан» бұрын денсаулықты дәріптеген. Олардың мұраты – тәні мен жаны сау адамдардың ынтымағына негізделген қоғамда өмір сүру еді. Алайда ата-бабаның мұратын жүзеге асыратын кейбір жастар нашақордың соңынан еріп барады. Қоғамда орын алып жатқан бұндай келеңсіз оқиғаларға қарап ішің ашиды, әрине. Басқа мемлекеттермен тереземізді теңестіреміз, алдыңғы қатарлы елдер сапынан табыламыз десек, жастарды салауатты өмір салты дағдысы қалыптасқан, рухы биік, жан дүниесі таза, адамгершілігі мол, білімді азамат болып ержетуге үгіттеуіміз қажет. Баланы адал жолға түсіріп, дұрыс тәлім-тәрбие беру алдымен үйдегі ата-ананың міндеті болса, келесі бала жанының бағбаны, екінші анасына айналған ұстаздар қауымына да тікелей байланысты. Біз, ұлылар жолын жалғаған ұлағатты ұстаздар, шәкірттеріміздің салауатты өмір салтын ұстанып, зиянды әрекеттерге жоламай, әр басқан қадамын қадағалап, келер ұрпақтың жарқын болашаққа аяқ басуына өз септігімізді тигізіп, дұрыс жол нұсқап отыруымыз қажет
Қазіргі қоғамымызда халықтың табиғи өсімі төменде, сырқаттанушылық және өлім-жітім деңгейі арта түсті. Әсіресе, балалар мен жастардың денсаулығына қауіп тудыруда. Темекі тарту, ішімдік пайдалану, есірткі құмарлық және улы заттарға әуестілік, адамгершілікке жат мінез-құлық кең етек алуда. «Өзін-өзі шексіз жақсы көру – ессіздік, өзін сыйламау - ақымақтық» деген қанатты сөз бар емес?! Құрметті, жас ұрпақ! Өздеріңді, адамгершілік қасиеттеріңді сыйлап, ар-намыстарыңа кір келтірмеу керексіңдер. Болашағымыз нұрлы, еліміздің ертеңі айқын болсын десек, ел болып, халық болып болашағымызды, ұлтымызды, тегімізді жоғалтып алмау үшін нашақорлық, ішімдік, шылым шегуден бойымызды аулақ ұстап, қоғамымыздың бұл түнектен арылуының жолын іздеп, салауатты өмір салтын насихаттауымыз керек. Қолдау болмаған жерде бір де бір іс табысты аяқталмайды Күш-жігерімізді біріктіріп, қоғамдағы зиянды дағдыларды тиюға күш бағыттауымыз керек. Болашақ – жастардың қолында! Ұстаздар қауымы есірткіге қарсы!
Денсаулықты сақта, түзу өсесің
Күнәдан пәк жәннат өмір кешесің
Көрген күнің қараңғы ғой дерт шалса
Харамменен тәніңді улап не етесің?
Жаман әдет көп шектірер қасірет
Сақта өзіңді, жақсылыққа жетесің
«Сау дене, азат ақыл, адал көңіл – үшеуімен бақытты өмір» деген нақыл сөзбен қорытындылағым келіп отыр.
Салауатты өмір салтын қолдайық!
Әдеттен жаман әманда аулақ болайық!
Өз өмірің өз қолыңда , ей, жастар,
Су ішпеген гүлдей болып қалмайық.
Қоңырбаева Мадина
Қызылорда облысы,
Қармақшы ауданы,
№85орта мектеп