Kerzhakov - ағылшын тіліндегі жаңа етістік

Ағылшын тілінде Ресей футбол құрамасының ойыншысының есімі етістікке айналды. Kerzhakov сөзі футболда қақпаға жақын жерден гол сала алмау дегенді білдіретін болды. Сөз ағылшын журналистерінің арасында кең қолданысқа ие болып, ағылшын тіліне енген сияқты. 

Алғашында бұл сөз Еуро-2012 ширек финалындағы Англия-Италия құрамаларының ойынында қолданылды. Мәтіндік трансляцияны жүргізіп отырған тілші Даниэле Де Россидің алты метрден сала алмаған соққысын былайша сипаттады: "Де Россидің қандай қателігі! Қалай ғана итальяндықтар осындай допты сала алмады? Бұрыштық допты Харт қарсы алса да, итальяндық ойыншы оны кері қайтарды. Қорғаушылардан өткен доп Де Россиге барып, ол қақпадан асырып Kerzhakoved қылды (who turned and Kerzhakoved a volley wide from six yards out!)"

Естеріңізге сала кетсек, Александр Кержаков Еуропа чемпионатының антирекордын орнатты. Ресейдің Чехияға қарсы ойынында ол қақпаға 7 рет соққы бағыттап, бір рет те дәл тигізе алмады. Ойнаған 3 матчында Кержаков қақпаға 12 соққы бағыттап, оның біреуін де голмен аяқтамады.

Дайындаған: Сания Аринова

Сурет: lenta.mk.ua