Алматыда өткен Құбылмалы әлемдегі заманауи әдебиеттің рөлі тақырыбында жазушылардың І Халықаралық форумыны мәресіне жетті. Әлем әдебиетшілері қазақ елінде 3 күндік шара аясында бас қосып, қазіргі заманғы әдебиет хақында пікір алмасады. Екінші күннің көтерген мәселесі Құбылмалы әлемдегі қазіргі заманғы әдебиеттің рөлі Жаһандану және ұлттық әдебиет, және XXI ғасыр талаптары және әдебиет сынды өзекті мәселелер бойынша алыс-жақыннан жиналған қаламгерлер сөз сөйледі. Дүниенінің төрт бұрышынан жиналған зиялы қауым кейде бір-бірінің сөзін қолдаса, кейде келіспей қалып жатты. Шарада сөз алған Түрік жазушы һәм ақыны Тарык Гюнерсель сөз басын ескі аңыз-әңгімеден бастады. Адам қаншалықты жаһандануға ұшыраған сайын соншалықты отанына жақын бола түседі деп, жаһандануға аса алаңдамайтынын айтты. Одан кейін мінберге шыққан танымал ағылшын аудармашысы Саймон Холлингсуорс аударманың жаһандануға тигізетін әсеріне тоқталып өтті. Қазақ әдебиетінен Абайды ағылшын тіліне аудара отырып, Мұхтар Әуезовтың шеберлігіне, талантына таң қалғанын тілге тиек етті. Отандық ақын-жазушылар да бұл игі шарадан тыс қалмады. Ақын, драматург Иран Ғайып Жаһандану және ұлттық әдебиет тақырыбында сөз қозғап, бүгінгі қоғамға көңілі толмайтынын жеткізді. Адам қанша жаһандануға ұрынғанымен ұлттық әдебиеттен, ана тілінен шет қалмау керек. Халықты Тәңір жаратады. Оны біз бұза алмаймыз. Ал ұлтты бұзатын жаһандану бізге керек емес, деді. Ал, Құбылмалы әлемдегі қазіргі заманғы әдебиеттің рөлі туралы сөз қозғаған жазушы Жүсіпбек Қорғасбек Рухани жаңғыру бағдарламасы бойынша қазақ ақын-жазушылары 6 тілге аударылып жатқанын тілге тиек ете келе, қазіргі әлемдік әдебиетке қазақ қаламгерлері де өз үлесін қосып жатқанын айтты. Осыдан соң орыс тілінде жазатын Израиль ақыны Алексей Цветков, түркиялық ақын Зейнеп Алие сынды қаламгерлер тақырып аясында әңгіме өрбітті. Шара соңында осы форумның өтуіне мұрындық болған Бигелді Ғабдуллин келген қонақтарға рахметін айта отырып, бүгінгі шара осымен тәмамдалғанын, келушілерге ертең, 12 қыркүйек сағат 19:00-де Жолдасбеков атындағы студенттер сарайында Олжас Сүлейменов, Алексей Цветков (Израиль), Сергей Гандлевский (Ресей) және Бахыт Кенжеев (АҚШ) секілді талантты ақындар қатысуымен поэзия кеші болатынын хабарлады. Естеріңізге сала кетейік, Қазақстан 1973 жылдан бері мұндай ауқымды халықаралық деңгейде әлем жазушыларының басын қосып көрмеген екен. I Халықаралық Жазушылар форумына Франция, АҚШ, Англия, Польша, Израиль, Қытай, Палестина, Түркия, Моңғолия, Чехия, Марокко, Израиль, Германия, Литва, Ресей, Өзбекстан, Қырғызстан және басқа да 16 елден аса көрнекті сөз зергерлері қатысып отыр. Осыған дейін форумның бірінші күні туралы жазған едік.