Барселона футбол клубының көшбасшысы Лионель Месси спорттық мансабындағы 600-голын соқты. Бұл - футболшы бағындырған жаңа белестің бірі. Испания чемпионатының ХХVII турында каталондық клуб өз алаңында Мадридтің Атлетико командасымен кездесті. Осыған дейін екі команда арасын 5 ұпай ғана бөліп тұрған. Камп Ноуда алаң иелері жеңіске жеткеннен кейін, ұпай айырмасы 8-ге жетті. Барселонаға жеңіс сыйлаған голды 26 минутта Лионель Месси соқты. Оның айып соққысынан бағыттаған добы қонақтар қақпасында тулады. Лионель Месси 600 голды 747 ойында соқты. Оның 539-ын Барселона сапында, 61-ін Аргентина құрамасы жейдесінде алаңға шығып соққан.
