Британдық боксшы Келл Брук отандасымыз Геннадий Головкинмен жұдырықтасқаны үшін қомақты қаржыға кенеледі. Ал қазақстандық боксшының қанша сыйақы алатыны белгісіз қалып отыр.
BoxingScene.com басылымының мәліметі бойынша, Келл Брук бұл жекпе-жектен шамамен үш миллион фунт стерлинг (төрт миллион доллар) табысқа кенеледі. Жекпе-жек 10 қыркүйек күні Лондондағы «О2» аренасында өтеді.
Кеше Геннадий Головкин Лондонда жанкүйерлер мен бұқаралық ақпарат құралдарына арнап, ашық жаттығу өткізді. Отандасымыз Ұлыбритания жерінде алғаш рет жекпе-жекке шығады.
Айта кетейік, Келл Брук бірінші орта салмақта жұдырықтасып келген боксшылардың бірі. Осыған дейін 36 кездесу өткізіп, барлығында жеңіске жеткен. Оның 25-де қарсыласын нокаутпен ұтқан. IBF чемпиондық атағына ие. Соңғы жекпе-жегін наурыз айының 26 жұлдызында өткізген. Шеффилд (Англия) қаласында өткен жекпе-жекте канадалық Кевин Бизьені екінші раундта нокаутпен ұтқан.