1878 жылы 10 шілде күні футбол әлемінде ерекше оқиға болды. Лондондағы футбол матчтарының бірінде полицей төрешілік етті.
Қазір ешбір футбол матчы төрешісіз өтпейді. Футболшыларды тәртіпке келтіретін төрешілер 1873 жылдан бері жұмыс істеп келеді. Бастапқыда төрешілер тек уақытты санап, футболшыларды алаңнан шығарып не командалар өзара келісе алмаған жағдайда төрелік айтатын. Олардың алаңдағы рөлі маңызды емес еді.
Футболға ысқырық келмей тұрып төрешілер ойынды басқару үшін дауыстап айқайлап немесе қолмен белгі беретін. 1878 жылы футболға жаңалық енді. Ол кезде кез келген адам төреші бола алатын. Футболды жақсы көретін кез келген жанкүйер ақша алатын кәсіби маманға қарағанда сапалы әрі тегін жұмыс істейді деп санаған.
10 шілде күні Лондондағы футбол матчтарының біріне полицей төреші болып тағайындалады. Матч барысында ойыншылар бір-біріне жұдырық ала жүгіргенде полицей ысқырады. Өткір дауыстан шошынған футболшылар сол сәтте-ақ төбелесті доғарады. Дәл осы күннен бастап ысқырық төрешілердің сенімді серігіне айналды.