Катар 2022 жылғы футболдан Әлем біріншілігін өткізу құқығына ФИФА мүшелерін сатып алу арқылы қол жеткізді. Бұл Францияның белді басылымы France Football журналының жеке зерттеуінде анықталған.
2022 жылғы футболдан Әлем чемпионатын қабылдайтын мемлекетті 2010 жылдың желтоқсан айында ФИФА-ның жиналысында анықтаған болатын. Сол жиналыс барысында Катар АҚШ, Оңтүстік Корея, Жапония, Аустралия сынды үміткерлерден дауыс беру қорытындысы бойынша озған.
France Football журналының айтуынша, Катар Африка футбол конференциясының басшылары (CAF) Исса Аят пен Жак Анумды 1,5 миллион доллар пара беріп сатып алған екен. Сондай-ақ, Франция президенті Николя Саркозидің өзі АҚШ-қа дауыс бергелі тұрған УЕФА президенті Мишель Платиниден геополитикалық жағдайларға байланысты Катарға дауыс беруін сұрағаны да белгілі болыпты.
France Football-дың тұжырымы бойынша, Саркози мен Платини Катардың патшасы Шех Тамим бин Хамад бин Халифа әль-Танимен 2010 жылы кездесіп, Катардың Франция футболына инвестициясы туралы сөйлескен екен. Ал 2011 жылы Катардың Qatar Investment Authority компаниясы француздық «Пари Сен-Жермен» командасының 70 пайызын сатып алған. Сол үшін де УЕФА президенті Мишель Платини өз дауысын Катарға берген деген пайымдар айтады.
Енді осы істің анық-қанығына жету үшін France Football журналы жинаған дәлелдердің барлығын ФИФА-ға жібереді. Сол жақта бұл жағдайға нүкте қойылатын болады.
Дайындаған: Уалихан Қосанбай
Сурет: eurosport.ru