Ұлттық бірыңғай тестілеудің үшінші күнінде қазақстандық үш түлек ең жоғары 125 балл жинады, деп хабарлайды Ұлттық тестілеу орталығына сілтеме жасаған Tengrinews.kz тілшісі.
3-5 маусым аралығында өткен тестілеуге 71 592 мектеп түлегі қатысты. Оның ішінде қазақ тілді 49 058 түлек болса, орыс тілді 22 534 оқушы болған. Сонымен максималды 125 балл жинағандар: Алматыдағы Жәутіков атындағы республикалық мамандандырылған физика-математика мектеп-интернатының түлегі Ботагөз Құспанғалиева, Екібастұздағы дарынды балаларға арналған №1 мектеп-лицейінің түлегі Әсел Айткенова және Шымкенттегі Дулати атындағы дарынды балаларға арналған үш тілде оқытатын №8 гимназия түлегі Аида Ысқақ.
Аиданың сөзінше, ол бесінші пән ретінде географияны таңдап алған екен. Сондай-ақ ол максималды ұпайға үміттенбегендігін, алайда өз біліміне сенімді болғанын айта кетті. "Тестілеу кезінде жан-жағыма жалтақтамауға, ешкімге көмектеспеуге тырыстым. Тек сұрақтармен ғана басымды қатырдым",-дейді Аида. Айта кетейік, Аида осы нәтижесімен "алтын белгісін" қорғап шықты.
Үшінші күні тестілеуге қатысқан 25 646 түлектің 7436 тиісті межені бағындыра алмаған. ҰБТ 9 маусымға дейін жалғасатын болады. Ал 15 маусымға дейін апелляциялық комисия мүшелері түлектерден келіп түскен арыздарды қарастырып, ақырғы нәтиже одан кейін жарияланатын болады.
Дайындаған: Болат Қосмағамбет
сурет: locman.kz