Қараусыз қалған "Фосфоршылар" мәдениет үйі жыл соңына дейін қала әкімдігінің мемлекеттік коммуналдық меншігіне өтеді.
Қала әкімі Ғабит Сыздықбековтің Әл-Фараби ауданының есептік кездесуінде тұрғындар тарапынан "Фосфоршылар" сарайының бүгінгі ахуалы бойынша мәселе көтерілген еді. Халықтың сұранысын тыңдап, қала басшысы нысанға арнайы барып, жағдайымен танысқан болатын.
Нәтижесінде, қала әкімінің тапсырмасымен қалалық прокуратура мен мемлекеттік мүлік және жекешелендіру департаментімен бірлесіп, ғимаратты қаланың коммуналдық меншігіне тез арада қабылдау бойынша нақты шаралар қабылданды. Яғни, талай жылдан бері түйіні тарқамаған мәселеге нүкте қойылды.
13 қараша күні "Фосфоршылар" мәдениет үйін қаланың коммуналдық меншігіне қайтару бойынша келісімге қол жеткізілді. Ары қарай ғимаратты көпфункционалды Жастар сарайы ретінде қайта қалпына келтіру және аумағын абаттандыру жұмыстары жүргізілетін болады. "Фосфоршылар" сарайы қаланың ең көрікті жерлерінің біріне айналатынына және халық игілігіне қызмет ететініне сенімдімін, - деп жазды қала әкімі Ғабит Сыздықбеков instagram парақшасына.
"Фосфоршылар" мәдениет үйі қаланың теңгеріміне өткен соң, ғимарат қайта құрылып, аумағына абаттандыру жұмыстары жүргізіліп, көпфункционалды Жастар сарайы болып ел игілігіне қызмет етеді.
Шымкент қаласы әкімінің баспасөз қызметі