Саңырауқұлақ және көкөністер қосылған киш

жеке
блог

20 сәуір 2014, 20:45

Киш (фр. - quiche) —

Франция асханасының тағамы. Қатпарлы қамырдың үстіне сүт, жұмыртқа және ірімшік салмасы бар ашық бәліш. Сүтті қоспасына ет, балық, көкөніс, т.б. қоса беруге болады. Бүгінгі мәзірде саңырауқұлақ пен көкөністер саламыз.

Сонымен, бүгінгі киштің құрамы:

Қамырына:

Ұн – 250 гр
Сары май – 80 гр
Жұмыртқа – 1 дана
Тұз

Салмасы:

Саңырауқұлақ – 150 гр
Брокколи – 100 гр
Болгар бұрышы – 100 гр
Жұмыртқа – 3 дана
Клегей 20% – 200 мл
Ірімшік – 150 гр
Зәйтүн майы – 2 ас қасық
Мускат жаңғағы

Киш бәлішінің дайындалу тәсілі

	Алдымен қамырын дайындаймыз.
	Қатып тұрған майды пышақпен турап аламыз. Туралған майды ұнның үстіне саламыз да, ұнымен бірге пышақпен туралаймыз.
	Үстіне 1 жұмыртқа, 2-3 ас қасық суық су және тұз салып қамырымызды илейміз. Бірақ қатты илеудің қажеті жоқ, ішінде араласпаған майы бола берсін, дәл осы толық араласпағанның арқасында қамыр біраз қатпарланады.
	Қамырды кеуіп қалмас үшін ас пленкасына орап, тоңазытқышқа қоямыз.
	Енді салмасын дайындаймыз.
	Саңырауқұлақ пен болгар бұрышын тураймыз.
	Брокколиді суық тұзды суға салып, отқа қоямыз. Су қайнағаннан кейін 1-2 минуттан кейін отты өшіріп, брокколиді бірден суық суға түсіріп аламыз. Ыстық табаға зәйтүн майын құйып қыздырамыз. Қызып тұрған табаға саңырауқұлақты және болгар бұрышын саламыз. Тұз салуды ұмытып кетпеңіз. Суы кеткенше қуырамыз.
	Табада қуырылған көкөністерімізді тарелкаға түсіріп аламыз. Пешімізді 200ºС-та қыздырамыз. Қамырды тоңазытқыштан алып, 3-5 мм қалыңдықта жаямыз да, қалыптың ішіне жақсылап салып, үстінен оқтаумен басып шығамыз, сонда артық жерлері кесіліп қалады. Қамырдың үстін шанышқымен тескілейміз, сонда пеште піскен кезде қамырдың асты үрленіп кетпейді. 15 минуттай пісіреміз.
	Қамыр үрленіп кетпес үшін, үстіне ауыр салмақты ыдыс салып та пісіруге болады. Мен бәліш пісіретін қалыпқа асбұршақ салып, ауырлатып, бастырып қойдым.
	Жұмыртқаны кілегеймен және ірімшікпен араластырамыз. Тұз, бұрыш және ұсақталған мускат жаңғағын қосамыз.
	Піскен қамырдың үстіне брокколи, болгар бұрышын және саңырауқұлақты салып,
	сүтті қоспамызды құямыз да, қайта пешке қоямыз. Киштің беті әдеміленіп қызарғанша, шамамен 30-40 минуттай пісіреміз.