Уақыт

 Уақыт-қылыш!

Уақыт-өмір өлшемі байқалмайтын,

Көзбен көріп, түр-түсін айта алмайтын.

Уақыт-терең тұңғиық сезілмейтін,

Батып кетсең кері шығып қайта алмайтын.

Уақыт-тылсым құбылыс ашылмаған,

Шексіз, шетсіз толқыны басылмаған.

Дүние бір тәуелсіз уақыт деген,

Одан ешкім ақылын асырмаған.

Бос өткізбей уақытты бағалай біл,

Жастық шақты уақытында жағалай біл.

Кеш болғанда қалмасқа әттең-ай деп,

Есеп беріп уақытыңды саралай жүр.

Уақыт алтын адамның қолындағы,

Қадірлесең құсың болар торыңдағы.

Пайдаланып сол құстың тілін біліп,

Меңгере алсаң бақыт болар жолыңдағы.

Уақыт-дауыл, күшімен кім теңеседі?

Ызғарынан ызыңдаған жел еседі.

Уақыт-қылыш, адамзат ойланыңдар,

Сен кеспесең, келіп сені ол кеседі!!!

                                          Бексұлтан БАСЫҚАРА,  2011жыл