Павлодар облысы - аймақтық іріктеудің жеңімпазын анықтайтын тәлімгерлерді, жұлдызды топ - Қыдырәлі Болманов, Қарақат Әбілдина, Ринат Малцаковты қарсы алды. Әлия Назарбаеваның «Жандану әлемі» қорының бастамасымен барлық Қазақстан бойынша «BalaTurkvizyon-Казақстан» байқауының Ұлттық іріктеуі жалғасуда.
Елімізге танымал жұлдызды жұп Қарақат пен Қыдырәлі Елордамыз Астанадан арнайы ат терлетіп, Ринат Малцаковпен бірге жергілікті жердің 8-13 жас аралығындағы дарынды балаларының ішінен ең үздігін таңдады.
13 маусым күні жұлдызды жетекшілер: Қарақат, Қыдырәлі, Ринат «BalaTurkvizyon-Казақстан» халықаралық балалар әні байқауының жартылай финалистін таңдап, оның «Жұлдызды үйде» республиканың әр өңірінен жиналған 15 үміткермен бірге Астана қаласында өтетін жартылай финал мен финалға дайындалуына жол ашты.
Таңертеңнен бастап «Достық» концерт залында өз өнерін көрсетуге Павлодар облысының Экібастұз қаласынан, Ақсу, Баянауыл ауданы, Павлодар қаласынан және қалаға қарасты Мичурин, Красноармейка, Ақтоғай аудандарынан өнерпаздар келді.
Павлодар өңірінің қатысушыларының музыкалық талғамы биік болып келді: джаз, блюз, классика, реп, хип-хоп және поп-музыка жанрындағы әндер орындалды. Үміткерлердің көпшілігі кішкентайынан бастап ән салуға машықтанған. Олар қазақ тілі, ағылшын, орыс, исапн, итальян тілдеріндегі әндер орындады.
Кішкентай өнерпаздар мен жақындары кешке дейін жеңімпаздың кім екенін тағаттана күтті. Қазылар алқасына талантты балалардың ішінен тек жалғыз үздігін таңдау қиынға түсті, өйткені, бұл іріктеуге бірінші рет дуэт пен топтар қатысуда. Ұзақ уақытқа созылған кейін, «Жұлдызды үйге», «BalaTurkvizyon-Казақстан» байқауының жартылай финалына жолдаманы тоғыз жасар Тамила Рахимбаева жеңіп алды. Іріктеу кезінде Тамила Алдияр Ыбраевпен бірге дуэтте өнер көрсетті. Бірақ, тәлімгерлердің шешімі бойынша Тамила үздік болып танылды.
Әрбір қатысушы марапатқа, құрметке ие. Олар Әлия Назарбаеваның «Жандану әлемі» қорының «Bala Turkvizyon» Ұлттық іріктеуінің қатысушысына арналған сертификат пен Ұлттық іріктеу әнұраны жазылған CD-дисктерге ие болды.
Құрметті өнерлі достар, Ұлттық іріктеудің келесі аялдамасы - Қарағанды қаласы. Сіздерді 16 маусым күні, «Кеншілер» сарайында, таңғы сағат 9-дан бастап күтеміз!!!
Қосымша ақпарат: «Bala Turkvizyon» Халықаралық ән байқауы – түркітілді елдер арасындағы Халықаралық «Turkvizyon» ән байқауының 8-13 жаc аралығындағы дарынды балаларға арналған баламасы. «Turkvizyon» - бұл көптеген мемлекеттер үшін «Евровидение» байқауын алмастыра алатын халықаралық деңгейдегі жаңа ән байқауы. Әлемдік музыкалық өндірісте үлкен құбылыс болғалы тұрған байқау түркі музыкасының өкілдерін бір сахнада тоғыстыруды мақсат тұтады. Байқаудың аудиториясы үлкен – 300 миллион көрермен. 2014 жылы байқауға 25 түркітілді елдер қатысты. «Turkvizyon-2014» қазақстандық әнші Жанар Дұғалова «Ізін көрем» әнімен жеңімпаз атанды. «Turkvizyon» ән-додасын «TÜRKSOY» түрік мәдениетінің халықаралық ұйымының қолдауымен ТMB TV түрік телеарнасы ұйымдастырып отыр.