Нағыз дос деген кім?
блог
Нағыз дос деген кім?
Мектепте оқып жүрген шақта үлгерімім төмендеп, көңіл-күйім түсіп жүрген кезімде шешем алдына шақырып алып әңгіме бастаған еді...
«Балам! Осы мен саған бір сұрақ қойсам жақсылап ойланып, маған жауабыңды берші» - деп еді.
Мен жарайды дедім. Сұрақ мынау «Саған кім өмірлік дос болып қалады?»
Мен: Достарым бар, солар болады!
Анам: Жоқ, оған күмәнім бар.
Мен: Бірақ рас, мама, мен үйде бір жыл бойы ауырып жатқанда жан досым менен зерігіп, тастап кеткен еді. Мен өзім ғана қалған едім сол қиын күндерде... Иә... Мүмкін болашақ әйелім шығар?
Анам: Әй, қайдам! Адамдардың ажырасқанын есіткен жоқсың ба? Мен: Айтпақшы рас, мама! Адамдардың ажырасқаны сирек емес осы күндерде!
Мен: Онда әкем мен шешем шығар?
Анам: Әрине! Бірақ біз шайтан болмаймыз ғой! Ана дүниеге өтеміз...
Мен зорға тыңдап бұл сөзді: Онда кім?
Анам: Ағайындарыңды ұмыттың ғой! Соларды айт!
Мен: Иә! Солар шығар!
Анам кесіп: Жоқ, балам! Ағайын жоқ болсаң бере алмайды, бар болсаң көре алмайды!
Мен: Онда әріптестерімнен біреу шығар...
Анам: Жоқ, балам. Бәсеке бар жерде достық қайдан табылады? Жұмысыңнан айырылсаң әріптестерің де жайына қалады!
Мен: Онда, мама, қинамашы мені, айтшы кім дос болады?
Анам: Балам, саған тек білім дос бола алады! Білімің болса жұмысты да табарсың, білімді маманды ешкім жұмыстан қумайды! Жұмыстағы әріптестерің де сыйлайды, белгілі орның болады арасында! Білімің болса ақшасыз қалмайсың, міне, сонда тума туыстарың сенен алыс кетпейді, тіпті жолдастарың да тастап кетуге себеп болмайды, әйелің де табысты әрі көп білсең сенен ешқайда да кетпейді, балам! Білімді тегін алуға болады тек кітап оқысаң болды! Балам, білімің тек басыңда жүреді, ешбір тірі жан сол білімді тартып аламын десе де қолынан келмейді, сол біліммен бөліссең ол ақша сияқты таусылмайды.
Міне, сол әңгіме маған көп пайдасын берген, ағайындар, бұл сөз бәрімізге арналған! Білімнен бай болып сол байлықпен жарысайық! Қалғаны сонымен байланысты! Тағы айтарым, біліміңмен бөліссең – одан білімің тек күшейе түседі екен!