Жақында өзбек лингвисі Жахонгир Маматовтың azattyq.org сайтына берген сұхбаты жарияланды. Тіл маманы сұхбатында Өзбекстан мемлекетінің латын әліпбиіне көшіру үдерісі халықты жас пен кәріге қақ жарды деген түйінге келген болатын, яғни латын әліпбиіне көшу халықтың екі топқа бөлінуіне алып келді: жастар латын қарпінде оқып-жазады, қарттар бұрынғы кириллицада қалып қойды деген болатын. Өздеріңіз білесіздер, біздің еліміз де латын қарпіне көшіп жатыр. Елбасымыз Н.Ә.Назарбаевтың «Болашаққа бағдар: рухани жаңғыру» бағдарламалық мақаласында қазақ тілін біртіндеп латын әліпбиіне көшіру жұмыстарын бастау қажет екендігін және 2025 жылға дейін іс қағаздар, оқулықтар мен құжаттар латын әліпбиіне аударылуы керек екендігі жазылған. Бұл жаңалық шыққалы бері қоғамда түрлі пікірлер пайда болды. Латын әліпбиіне көшуді көбінесе жасы үлкен адамдар, қариялар қолдамайды, себебі олар кириллицамен жазуды үйреніп қалған. Оларға жаңа әліпбиге бейімделу қиындық туғызады. Ал, жастар, меніңше латын қаріптеріне тез үйреніп кетеді, себебі олар күнделікті әлеуметтік желілердегі посттарды, смс хаттарды ағылшынша жазып жүр. Сонымен қатар, кейбір азаматтар латын қарпіне көшуді босқа қаражат жұмсау деп түсінеді, себебі барлық құжаттарды, оқулықтарды аудару, мекемелердің аттарын өзгерту қаражатқа келіп тіреледі. Мен өз басым, латын әліпбиіне көшуді қолдаймын, өйткені ол ел дамуын жаңа сатыға көтеріп, заман ағымына сай дамуына жол ашады. Иа, мүмкін бастапқы бір-екі жылда сәл қиналармыз, бірақ кейін мұның жемісін көреміз. Қарапайым мысал, кезінде еліміздің елордасы Астана қаласына көшірілгенде, халықтың көпшілігі наразы болды. Алайда, қазір жас Астанамыз әлемдегі әдемі әрі дамыған елордалардың біріне айналды. Сол сияқты, қазір барлығы латын әліпбиіне көшуге қарсылық білдірсе де, ертең халықтың болашағы жарқын болары анық, себебі латын әліпбиіне көшу ұлтымыз үшін жасалған маңызды қадамдардың бірі.