Құрметті оқырмандар, біз сіздермен www.massaget.kz порталында жүздесіп отырғанымызға қуаныштымыз. Алдағы уақытта осы портал арқылы біраз жазба жариялайтын боламыз.
Міне, тәуелсіз еліміздің ақпарат айдынында «Гүлстан» журналы өзінің ақ желкенін көтергеніне (№1 наурыз 2005) 6 жыл толыпты. Енді, журнал жайында қысқаша ақпарат бере кетсек.
.
Ғылыми-танымдық бағыттағы айрықша еңбегі үшін журнал 2010 жылы Қазақстан Республикасы Ұлттық Мемлекеттік Кітап палатасының сериялық басылымдарды тіркейтін ISSN Ұлттық Орталығында (ЮНЕСКО, Франция, Париж қаласы) тіркеліп, арнайы сертификатқа ие болды.
“Гүлстан” журналының алға қойған мақсаты – әр шаңырақтың ауласын гүлдендіру арқылы бүкіл мемлекетіміздің гүлденіп-өркендеуіне үлес қосу болғандықтан, осы жолдағы игі шараларды бірлесіп атқаруымыз керек. Елімізде жаңа саябақтар ашылып, әрбір мектеп пен балабақша ауласы гүлге орансын. Табиғат-ананы аялап, жеріміздің өсімдік байлығын қорғап-дамытуға бар күш-жігерімізбен атсалысайық.
Біз өз журналымыз арқылы сіздерді жыл бойы сан алуан гүлдер мен таныстырып, олардың күтімі жайында қажетті мәліметтер береміз. Еліміздегі табиғи қорықтар, экологиялық проблемалар, қала көгалдандыруға қатысты толғамды пікірлер мен тұжырымды ойларды ортаға саламыз.
Бұрын журнал айына 1 рет шыққан болса, биылғы жылдан бастап маусымға байланысты 3 айда 1 рет шығатын болады. Сонымен қатар, «Өсімдіктер әлемі» атты оқу-әдістемелік кешенін шығарып отырмыз.
Сіздер де өздеріңіздің сүйікті өсімдіктеріңіз, ауладағы бағыңыз немесе үйіңіздегі гүліңіз туралы материал жолдасаңыздар болады. Біз сіздердің талап-тілектеріңізді ескеретін боламыз. Біздің журнал сіздердің игіліктеріңізге қызмет жасап, қажеттіліктеріңізге жарап, көмекші бола білсе, біз үшін сол үлкен жетістік.
Редакция ұжымы