15 адамды жұмыспен қамтып отырған "KAZ-AQUA" ЖШС-інде екі балық өсіру базасы бар. Бақтақ балығының аналық табыны экологиялық таза, тау өзенінің бассейінде уылдырық шашады. Кейін 250-500 грамм салмақтағы шабақтар екінші балық өсіру базасына ауыстырылып, ары қарай сатуға шығарылады. 3 гектар аумақты алатын тоғаннан арнайы облыс көлемінде тапсырыс қабылданады.
Балықтардың еркін өсуіне қолайлы жағдай жасалған. Таудан келетін суға артизан суы қосылады. Бір метрге дейін жететін бекіре балығына тұтынушылар тарапынан қызығушылық жоғары. Балықтарға арнайы жем қоректі шаруашылық Польшадан алдырады. Мемлекеттік тараптан әзірге ешқандай субсидия алмаған.
Жылына 100 тонна балық өнімдерін алуды жоспарлаған шаруашылық алдағы уақытта балық өнімдерін қайта өңдейтін цех салуды қолға алмақ. Сондай-ақ, болашақта арнайы туристік аймақ ашылып, келген қонақтарға балық аулайтын мүмкіндік қарастырылады. Енді Жазиралы Жаркент өңірінде Каспийге бармай-ақ бекіре аулауға мүмкіндік бар.