Форум – интернетте ақпарат алмасудың бір түрі.
Ежелгі Римде форум (Forum Romanum) деп қала тұрғындары жиналып, өзекті мәселені талқылайтын қаладағы базар алаңын атаған.
Қазіргі кезде техниканың дамуына байланысты үйден шықпай-ақ интернет арқылы форумдарда ақпарат алмасуға болады. Форумның адамдар қызығушылығына байланысты әр түрлі тақырыптық түрлері болады. Мысалы, автомобиль, үй жануарлары, гүлдер, денсаулық және т.б.
Форумда тегін көмек алуға немесе керісінше, тегін көмек беруге болады. Мысалы, мен компьютерде Microsoft Excel бағдарламасымен жұмыс жасап отырмын делік. Мен білмейтін сұрақтар туады. Таныстарыңды мазалай бергің келмейді. Әр сұрақ туындаған сайын мамандардың көмегіне жүгіну қаржы мәселесіне әкеліп соғады. Мұндай жағдайда интернетте сол бағдарламада жұмыс істейтін, оны ұнататын және ондағы сұрақтар бойынша тегін көмектесе алатын адамдар болады. Форумдар сол үшін жасалған. Яғни, ол жақта нақты қандайда бір тақырыпқа қызығатын адамдар жиналып отырады.
Форумның мәні – ойы бір жерден шығатын адамдардың қарым-қатынасы, риясыз көмек және тәжірибе алмасу. Кей жағдайда интернеттен де кітаптан да таба алмайтын ақпаратты форумнан алуыңыз мүмкін. Себебі форумда адамдар өз басынан өткен тәжірибемен және өзекті мәселелермен бөліседі.
Төмендегі видеода massaget.kz сайтындағы форум бөлімін қалай қолданамын деген сұраққа жауап беретін боламын. Сіздерге көмегі тиеді деген үміттемін.