жеке
блог

Алысқа ұшқан арман

–        Тосқал қойып күдікке мен,

Арман толы үмітпенен

Кетем ертең оқу үшін, жаным, басқа қалаға,

Келем сосын демалыста бір жыл салып араға,  –

деп сұлу қыз баяндады жігітіне хабарын,  –

Басқа жақта білім қуып, ілім жолын табамын.

Болашаққа қол ұстасып бір өзіңмен барамын,

Ең алдымен бітіп алсын қаладағы сабағым.

–        Бірақ, гүлім, сенсіз қалай бір жыл бойы күн кешем,

Қалай түнде көз ілемін жағдайыңды білмесем.

Сені бір сәт көрмесем мен тамағымнан ас өтпей,

Уға толы тұрғандай ғой ішетін шәй бір кесем.

Бар мақсатың білімпаз боп, содан өрнек тоқу ма?!

Болар еді түссең осы қалаға да оқуға.

–        Жо‑жоқ, жаным, көңіліңді жауламасын қайғы‑мұң,

Ермек қыла жүре тұршы сағыныштың айдынын.

Ал сен мені қазынамнан айырғалы отырсың,

Қазынам не?!

Ол – білім ғой, білім менің байлығым.

Көңілдері пәк жарасып, ұштасатын теңізбен,

Жүрегіне махаббаттың тәтті балын жегізген,

Жан едік қой сезім толы әр жемісте тең үзген.

Сондықтан да ертең кешке вокзалға кел, өтінем,

Ұзақ мені көре алмассың сәл кешіксең сегізден.

                                    ***

Орын алған қаладағы тыныштықты құртты да,

Әре‑сәре болып жатыр қуанышты жұрт мына.

Қимастық от сезімі бар қыздың барлық ісінде,

Келіпті жұрт шығарып сап, ақ жол тілеу үшін де.

Бірақ қыздың болмаған соң топ ішінде күткені,

Жүрегінде солғын мұң бар, ал көңілі күпті еді.

Сүйгені жоқ.

Келмеді әлі.

Бұл сезімнің біткені.

Ал жігіттің бастығы да адам екен тірі сұм,

Уақытында жібермеді «бітпеді, – деп, – жұмысың».

«Бүйтіп жанды жалықтырар жұмысыңыз құрысын», –

деп барлығын тастады да, жігіт қызға асықты.

Зулап кетті көлігімен жақын қылар қашықты.

Ал бикешті туыстары жатса дағы құшаққа ап,

Өз сезімін жерлеуі де,

Сүйгенің келмеуі де

Бара жатыр қыз жүрегін айықпастай пышақтап.

Жігіт жолда келе жатыр алға қарай бағы айдап,

Үлгермесе, қалып қояр көңілінде талай дақ,

Сәл кешіксе, ұшқалы тұр өмірінде арай бақ.

Алыс‑алыс жолдық маңға

Келе жатыр сондықтан да

Қолындағы сағатына жиі‑жиі қарайлап.

Пойыз қазір қозғалады, жақындады уақыты,

Бірақ қыздың көрінбеді, келмеді әлі бақыты.

Жігіт, міне, келіп қалды, қалды соңғы бұрылыс,

Зуылдайды көлік деген заманауи құрылыс.

Көрісуді жазбапты Алла, бұл – фәнилік құбылыс:

Соқты біреу бүйірінен көлігіне жігіттің,

Көлік сынды.

Осы болды бөлінгені үміттің.

Тосқал болып жігітке тән орындалмас арманға,

Жол апаты орын алды вокзалға сәл қалғанда.

Осы жерде бәрі бітті, тек сезімі сақталды,

«Кеш мені» деп жігіт жылай о дүниеге аттанды.

Күтіп‑күтіп келмеген соң пойызына қыз мінді,

Жанарына жас толды оның, мұңға беріп тізгінді.

Әлі өшпеген сезімі оның қасіретке батқандай,

Ақ арманын алыс жаққа алып бара жатқандай.

«Сен бар кезде қарқыны мол, теңіз басқан кеме едім,

Енді ешкімге керек емес ұшы сынған жебемін.

Өзге жанды ұнаттың ба?! Күткен едім, жоқсың сен,

Екеуімізді ажал ғана айырады деп едің»

Деп қыз жылап бара жатыр ойдан кеткен ажарлы үн,

Қимастықтың сезімімен бойын басқан тажал мұң.

Жігітіне лағнет айтып, іштей қарғап барады,

Білмей‑ақ қыз ол екеуін айырғанын ажалдың.

Бөлісу:
Пікір қалдыру үшін сайтқа кіріңіз
Өзгерту



Жұлдызды блогтар

Жайлауға атпен бардық // Екіаша, Көкбұлақ, Шет Меркі, Орта Меркі
Жайлауға атпен бардық // Екіаша, Көкбұлақ, Шет Меркі, Орта Меркі
Шет Меркі өзені, Тоғызбұлақ ауылының тамаша табиғаты
Шет Меркі өзені, Тоғызбұлақ ауылының тамаша табиғаты
Ораза айының өңірлер бойынша кестесі
Ораза айының өңірлер бойынша кестесі