Менің өмірімді өзгерткен Күнделік
жеке
блог

Менің өмірімді өзгерткен Күнделік

 "Үйде отырып, бала тәрбиелеп,
отбасының берекесі, шамшырағы бола білу өте маңызды.
Әйел адам үшін одан асқан бақыт жоқ",- дейді бүгінгі менің кейіпкерім Назгүл Беспаева. Замандасым Назгүл көпшіліккке "Менің өмірімді өзгертетін Күнделіктің" авторы ретінде таныс. Баспасөз қызметшісі, журналист, әйел мен ер адам арасындағы психологияны терең зертеп жүрген жан.

-  Өзіңізді таныстырып өтсеңіз? Мамандығыңыз қандай?

Мен Шығыс Қазақстан Облысының тумасымын, Күршім ауданында дүниеге келгем. Әкем мен анам, інім сол жақта тұрып жатыр. Мен Астана қаласына тұрмысқа шықтым. Қазір Алматыда тұрып жатырмыз. Бір ұл, бір қызым бар. 

         Менің мамандығым негізі журналист. Қазіргі уақытта бала күтіміне байланысты демалыстамын. "ҚазАвтоЖол" ҰК АҚ-да баспасөз қызметінде жұмыс жасаймын. Соңғы кезде, көптеген қыз-келіншектер "Сіз психологсыз ба?" деп жиі сұрайды. Бірден айтайын, менің әзірге осы сала бойынша дипломым жоқ. Дегенмен, бүгінде "ПУТЬ ДУШИ" деген керемет курсты онлайн оқып жүрген жайым бар. Ол Алла жазса, келесі жылы жазда аяқталады. Менің алдағы уақытта журналист ретінде қызметімді жалғастырамын ба, әлде психологияға қарай бет бұрамын ба,  сол кезде белгілі болады. Ал, әзірге, мен жан-жүрегімді тыңдау үстіндемін.

 

- "Менің өмірімді өзгертетін Күнделікті" жазу идеясы қайдан келді?

- Тұрмысқа шығысымен көптеген мәселелер орын ала бастады. Бала тәрбиесі, енемен қарым-қатынас, жарыңмен немесе басқа да жақын адамдарыңмен болатын кейбір түсінбеушіліктер, мені осы психология іліміне деген қызығушылығымды арттырды. Өйткені, мен кез-келген қиындық бола қалған жағдайда, негізгі себепті өзімнен іздедім. Өзімнің және басқа адамның психологиясын, табиғатын жетік түсінгім келді. 4-5 жыл шамасында осы саланы  терең меңгеріп, түрлі онлайн семинарлар мен вебинарларға, әйелдерге арналған марафондарға, тренингтерге қатысып жүрдім. Өзімнің жағымсыз мінездеріме, кейбір әдеттеріме тура қарап, оларды мойындап, олармен жұмыс жасай бастадым.

Сол өзіммен тынымсыз жұмыстың арқасында, менің өмірім жақсы жағына қарай өзгере түсті. Жақындарыммен ара-қатынысым жылы әрі шынайы бола түсті, мен адамдарды мінсіз қабылдап, олардың әр-қайсысына үлкен тұлға ретінде қарап, жақсы көруді үйрендім. Біреуді сөгу, жамандау сияқты әдеттерімнен толықтай арылдым деп айта аламын. Біз, қазіргі жастар көп нәрсені білеміз, бірақ оны жүзеге асырмаймыз, білімімізді күнделікті өмірде қолданбаймыз. Мен бұл жерде рухани, біздің ішкі-жан дүниеміз туралы айтып отырмын.

         Міне, мен осы білгенімді, үйренгенімді қыздарға арнап, бір керемет туынды етіп шығаруды жөн санадым. Осылайша, өмірге "Менің өмірімді өзгертетін Күнделік" келді. Бұл күнделікте әйел қауымына арналған өте пайдалы, күнделікті өмірде қажет көптеген ақыл-кеңестер жинақталған. Оның жартысы, менің өзімнің өмірден түйгенім болса, жартысы дана тұлғалардың нәзік жандыларға қатысты айтылған пікірлері. Оның үстіне, бұл күнделікте толтырылуға тиіс  3  кесте бар. Оның бірі, "Қызықты идея", "Бүгін ең маңызды ол –......", "Мен бұл күнге не үшін ризамын" деген сияқты кестелерді үнемі толтырып отыру, үлкен жетістіктерге жетелейді.

 

- Осы Күнделікте жазылған құнды  кеңестеріңіздің өзіңізге қаншалықты пайдасы тиіп жатыр?  Сондай-ақ,  тұтынушыларыңыз қандай әсерде?

- Күнделікте жазылған ойлар мен дана сөздер олар үнемі менің жадымда. Себебі, олардың көбін өз басымнан өткеріп барып, жазғандықтан, санамда сайрап тұрады. Күніне бір рет қолыма алып, кейбір кеңестерді оқып, ұмытып бара жатқаным болса, ойыма салып, бекітіп қоямын. Оның үстіне күнделіктегі жаңағы кестелерді толтырып,  жақсы болып қаламын. Ол жерде маған қатты ұнайтыны, "Мен бұл күнге не үшін ризамын?" графасы. Кешке отырып, кімге, не үшін риза екенімді жазып отырып, өміріме шүкіршілік етемін, қасымдағы адамдарға маған түрлі жағдайларды бастан өткеруге көмектескендері үшін, мен олардан үлкен сабақ алып жүргенімді ойлап, маған қуаныш немесе реніш, ашу, ыза сыйлаған адамдарға да ризышылығымды білдіремін. Өйткені, олар маған өзімді жаңа қырымнан тануға, алға жылжуға көмектеседі. Күнделікті толтырып, өткен күнімді санамнан өткізіп, жан-дүниеммен сырласып болған соң, ерекеше сабырлы, жайбарахат күй кешемін. Сол күйім өзіме ұатты ұнайды.

         "Менің өмімді өзгертетін Күнделікті" алған қыздардың пікірін үнемі сұрап отырамын. Олар өздеріне уақыт тауып, күнделікті толтыруға тырысатындықтарын, қыздарға арналған пайдалы кеңестердің барлығы бір жерде болғандығы қуантады деп жазып жатады. Мен оған өте қуаныштымын.

- Алдағы уақытта қандай жоспарларыңыз бар? Бізбен бөлісе аласыз ба?

-  Алла жазса, болашаққа қойған мақсатым, арманым өте көп. Оны уақыты келген кезде біле жатарсыздар. Мен негізі ырымшыл жанмын. Әлі болмаған істі, болады деп,  алдын ала айта алмаймын. Барлығы бір Алланың жазуымен жүзеге асатынына сенімдімін. 

         "Менің өмірімді өзгертетін Күнделікті" қазақ тілінде жаздым. Сұранысқа ие дүние екеніне көзім жетті. Жаңа жылдан кейін, тағы бір тиражды қолжетімді бағамен  шығаруды жоспарлап отырғаным рас.

         Ал, жалпы осындай күнделікті қазргі уақытта орыс тілінде дайындау үстіндемін. Оның мазмұны мүлде басқаша болмақ, рухани дүниемізді тереңдетуге арналған өте құнды туынды болады деген сенімдемін.          

        -Сұқбатыңызға рақмет! Шығармашылық табыс тілеймін! Айтарыңыз бен жазарыңыз  таусылмасын!

 Әңгімелескен: НАЗИРА БУРХАНОВА