Тілейміз дұға, алаулап таңым атқалы:
Сөнбесін сәуле төгілген шаңырақтағы!
Түндікті елдің басынан түреміз деумен
Өз басын тіккен ұлтымның саңлақтары.
Ұзатып салып соқпаққа қайран ұлдарды,
Құс-қанат талған атырап – аймағым қалды.
Елдікке жеткен айқындап күрестің жолын,
Желбіре ашық аспанда байрағым мәңгі!
Тарихқа қарап, тамырда бұрқап қанымыз,
Бұрқаған қанмен жазылар жыр – тапқанымыз!
Зар-наланы тек оқитын кітаптан ғана
Тәуелсіздіктің бақытты ұрпақтарымыз!
Кең болсын деумен, қазағым, керегелерің,
Уыздай басым уыққа шегеленемін!
Дәуірлер кешкен азаптың өтемі болып,
Жасашы мәңгі жасампаз егемен елім!