Арыстанбек Мұхамедиұлының қандай мүлкі тәркіленетіні белгілі болды

Астана қаласы №2 Байқоңыр аудандық сотының судьясы Бағлан Ыдырысов экс-министр Арыстанбек Мұхамедиұлына және басқа да қатысушыларға қатысты іс бойынша 43 миллион теңге өндіріп алуға қаулы етті, - деп хабарлайды Massaget.kz тілшісі.

"Мәдениет және спорт министрлігінің материалдық залалды өндіріп алу туралы азаматтық талабы ішінара қанағаттандырылсын. Мемлекет пайдасына Мұхамедиұлы, Нұразхан, Көшенов және Сәдуақасовадан 43 миллион 829 мың 114 теңге мөлшерінде материалдық залал сомасы бірлесіп өндірілсін. Осы үкім заңды күшіне енген күннен бастап сотталғандарға азаматтық талап қою бөлігінде үкімді ерікті түрде орындау үшін бір ай мерзім белгіленсін", - деді судья.

Ол тергеу сатысында Мұхамедиұлы 111 миллион теңгеден аса шығынды ішінара өтегенін атап өтті.

Сот мынадай шешім шығарды:

• Әрбір сотталған адамнан - Мұхамедиұлы, Нұразхан, Көшенов, Сәдуақасовадан мемлекет кірісіне 328 мың 718 теңгеден мемлекеттік баж өндіріп алынсын;
• Әрбір сотталған адамнан - Мұхамедиұлы, Нұразхан, Көшенов, Сәдуақасовадан процестік шығын үшін мемлекет кірісіне 855 мың 343 теңгеден өндіріп алынсын;
• Әрбір сотталған адамнан - Мұхамедиұлы, Нұразхан, Көшенов, Сәдуақасовадан жәбірленушінің пайдасына 20 АЕК, 55 мың 560 теңге мөлшерінде мәжбүрлі төлем өндіріп алынсын;
• Көшеновтың мүлкінен - УАЗ 390945 маркалы көлік құралына, Астана қаласындағы Ұлы дала, 7/7 мекенжайындағы пәтерге, Ұлы дала, 7/2 мекенжайындағы тұрақ орнына азаматтық талап қою бөлігінде үкімнің орындалуын қамтамасыз ету үшін салынған тыйымды сақтау;
• Азаматтық талап қою бөлігінде үкімнің орындалуын қамтамасыз ету үшін Мұхамедиұлының мүлкінен Toyota Camry маркалы көлік құралына салынған тыйымды сақтау.

Айта кетейік, 2022 жылғы мамырда Арыстанбек Мұхамедиұлы қамауға алынған еді. Ол кезде Мұхамедиұлы ұлттық музейді басқарып тұрған болатын. 28 мамырда сот санкциясымен Мұхамедиұлына қамауда ұстау түріндегі бұлтартпау шарасы тағайындалды.

Сыбайлас жемқорлыққа қарсы қызмет "Әлем мұражайлары бойынша "Алтын адам" шеруі" халықаралық көрмесін өткізу бойынша мемлекеттік сатып алу туралы шарт шеңберінде 146 миллион теңге мөлшерінде бюджет қаражатын жымқыру дерегіне қатысты ұлттық музейдің лауазымды тұлғаларына және басқа да адамдарға қатысты тергеуді бастады. 

Шілдеде Сыбайлас жемқорлыққа қарсы қызмет агенттігі өкілдері ұлттық музейдің бұрынғы басшылығына және басқа да адамдарға қатысты 2017-2018 жылдары "Ақпараттық ресурстарда нысандарды танымал ету үшін жалпыұлттық тізбеге енгізілген нысандардың 3D-модельдерін құру" жобасын іске асыру кезінде аса ірі мөлшерде бюджет қаражатын ұрлау дерегі бойынша тергеу жүргізіліп жатқанын мәлімдеді. Ресми деректер бойынша тергеліп жатқан қылмыстық істер бойынша мемлекетке келтірілген залалдың алдын ала сомасы шамамен 7 миллиард теңге болады.

Биыл қаңтарда бұл іске қатысты жаңа деректер пайда болды. Ұлттық музей директорының бұрынғы орынбасары Алмаз Нұразханның да қамауға алынғаны белгілі болды. Ал биыл ақпанда Арыстанбек Мұхамедиұлын қамауда ұстау мерзімі екі айға ұзарды. Бұған дейін прокурор Мұхамедиұлын тоғыз жылға бас бостандығын айыруды сұраған болатын.

Арыстанбек Мұхамедиұлының соты қашан өтетіні белгілі болды

Еске салайық, бұған дейін ол сотта кінәсін мойындамайтынын айтқаны хабарланған еді. Экс-министр Арыстанбек Мұхамедиұлы 8 жылға бас бостандығынан айырылды. 

Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!