Елена Рыбакина Берлиндегі турнирді жеңіспен бастады

Қазақстанның бірінші, әлемнің 3-ракеткасы Елена Рыбакина Берлин (Германия) WTA 500 турнирінің екінші айналымына шықты, - деп хабарлайды Massaget.kz тілшісі.

Жарыстың екінші ракеткасы болып тіркелген қазақстандық теннисші алғашқы айналымда дүниежүзілік рейтингіде 139-орында тұрған, іріктеу сайысы жеңімпаздарының бірі, ресейлік, 20 жастағы Полина Кудерметовамен кездесті. 

Бірінші партияда есеп 5:4 болған мезетте Елена брейк жасай білді – 6:4.

Екінші сетте Рыбакина 3:0 есебімен алға кетті. Ақыры матчты тағы бір брейкпен түйіндеді – 6:2.

Бір сағаттан астам уақытқа созылған матчта Елена 9 эйс жасап, 11 брейк-пойнттың үшеуін пайдаланды.

Рыбакина ширек финалға шығу үшін әлемнің 23-ракеткасы, хорватиялық Донна Векичпен кездеседі.

Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!