Қазақстанда дәрумендер 30 пайызға қымбаттады
Қазақстанда дәрумендер 30 пайызға дейін қымбаттаған. Иммунитетті көтеретін түрлі қоспа кей дәріханаларда жоқ. Фармацевтердің пікірінше, отандық өнімдердің бағасы импорттық өнімдерден қалыспайды, - деп хабарлайды КТК телеарнасы.
Диетолог Елена Мамай түрлі дәруменді мезгіл сайын қолданатын жандардың бірі. Соңғы уақытта сұраныстағы дәрумендердің құны шарықтағанын айтады.
"Магний Б 6 дәруменін өзіме соңғы рет желтоқсан айында 2015 теңгеге сатып алдым. Таусылғасын екі апта бұрын дәріханаға барсам, бағасы екі есеге өсіп, 4800 теңге болып кетіпті. Мүмкін қорабы мен ішіндегі дәрумендер саны жағынан айырмашылық бар ма деп қайта-қайта салыстырып қарадым. Сол 60 дана. Бұл дегеніміз сұмдық. Мұндай бағада ешкім алмайды енді", - Елена Мамай.
Дәрумендердің қымбаттағанын қаладағы дәріхана басшылары да жоққа шығармайды. Олардың айтуынша, бағаның өсуіне жыл басынан бергі доллар мен рубльдің қайта-қайта құбылуы себеп болған. Соның салдарынан, тіпті иммунитетті көтеретін дәрумендердің кейбірі елге жеткізілмейтін де болыпты.
"Шет мемлекеттерден келетіндер 40 пайызға, Ресейден келетіндер 10-30 пайызға дейін өсті", - дейді дәріханалар желісінің басшысы Камилла Коберидзе.
Дәрумендер әсіресе соңғы екі айда қатты қымбаттаған. С дәрумені бар итмұрын шәрбаты мамырға дейін 500 теңгеден сатылса, қазіргі құны 680 теңге.
Г. Досымшалова"Негізгі дәрілік заттардың арнаулы шекті бағасы бар. Бірақ 5 және 10 пайыздың аралығында қымбаттағаны байқалады. Бағаның шекті бағадан асқанын көргендер біздің департаментке шағым түсіре алады. Дәлелденсе онда сол дәріхана иесіне әкімшілік құқық бұзушылық хаттамасы толтырылып, айыппұл салынады. Ол айыппұлдың көлемі 130 айлық есептік көрсеткіш", - дейді ҚР ДСМ Медициналық және фармацевтикалық бақылау комитетінің бөлім басшысы Әсия Молдиманова.
