Енді Қазақстандағы бейнебақылау камераларына бет-әлпетін тану жүйесі қосылады

Алматы мен Атырауда бейнебақылау камераларына бет-әлпетін тану үшін жасанды интеллект қосылды, - деп хабарлайды Massaget.kz тілшісі.

Бет-әлпетін тану жүйесін енгізу туралы Қазақстанның Бас прокуроры Берік Асылов Х әлеуметтік желісіндегі парақшасында хабарлады.

Бас прокуратура сот төрелігінен жасырынған адамдарды іздестіру барысына қадағалауды күшейтті. Прокурорлар ағымдағы жылы халық көп шоғырланатын жерлерде бейнебақылау камераларына өздері мониторинг жасау арқылы 53 қашқынды танып, ұстау шараларын қабылдады.

— Berik Asylov (@Asylov_GenPr) August 6, 2024

Берік Асыловтың айтуынша, Бас прокуратура сот төрелігінен жасырынған адамдарды іздестіру барысына қадағалауды күшейткен. Прокурорлар биыл халық көп шоғырланатын жерлерде бейнебақылау камераларына өздері мониторинг жасау арқылы 53 қашқынды танып, ұстау шараларын қабылдаған.

Ал қазір бұл жұмысқа жасанды интеллект тартылды, бірақ әзірге екі қалада ғана.

"Биыл тамыздан бастап Алматы мен Атырау қалаларындағы бейнебақылау камераларына біз қашқын қылмыскерлерді, борышкерлерді және хабар-ошарсыз кеткендерді автоматты түрде тану бойынша AI элементтерімен IT-әзірлеуді қостық. Екі күн ішінде тергеуден жасырынған 2 адам және хабар-ошарсыз кеткен 2 адам танылды", - деді Берік Асылов.

Ол ЖИ камераларының көмегімен жас пен сырт келбеттің өзгеруіне қарамастан адамдарды тауып, іздеу шараларын күшейтуге болатынын айтты.

"Прокурорларға жүйені барлық өңірлерге енгізу тапсырылды. Қазір 9 мыңнан астам адам іздестіріліп жатыр, оның 2,2 мыңы қылмыскер және 2 мыңы хабарсыз жоғалғандар".

Instagram парақшамызға жазылып, ең қызықты ақпараттарды бірінші болып оқыңыз!