Бишімбаевтың адвокаты полицияға арыз жазды: тергеу басталды

Сотталған бұрынғы ұлттық экономика министрі Қуандық Бишімбаевтың адвокаты Ерлан Ғазымжанов өзіне қоқан-лоққы көрсетіліп жатқанын айтып, полицияға арыз жазды. Бұл іс бойынша тергеу басталды, - деп хабарлайды Massaget.kz тілшісі.

Соталды тергеуді Астана қаласы Сарыарқа аудандық полиция бөлімі жүргізіп жатыр.

"Белгісіз тұлғалардың қорқытуы бойынша Қылмыстық кодекстің 409-бабының 2-бөлігі ("Сот төрелігін жүзеге асыруға немесе соталды тергеп-тексеруге байланысты қорқыту немесе күш қолдану әрекеттері" – еск.) бойынша соталды тергеп-тексеру басталды. Бұл туралы Ішкі істер министрлігіөкілдері Tengrinews.kz редакциясының ресми сауалына берген жауабында хабарлады. 

Қазір істің барлық мән-жайын толық және жан-жақты зерделеуді қамтамасыз етуге бағытталған тергеу әрекеттері жүргізіліп жатыр, оның нәтижелері бойынша процестік шешім қабылданады.

Қылмыстық кодекстің 409-бабының 2-бөлігінде соталды тергеп-тексерудің жүзеге асырылуына, iстiң немесе материалдардың сотта қаралуына не сот үкiмінiң, шешiмiнің немесе өзге де сот актiсiнің орындалуына байланысты прокурорға, сотқа дейінгі тергеп-тексеруді жүзеге асыратын адамға, қорғаушыға, сарапшыға, сот приставына, сот орындаушысына, сол сияқты олардың жақындарына қатысты жасалған қорқыту немесе күш көрсету әрекеттерi қарастырылған. 

Бұл қылмысқа 3 мың АЕК-ке дейінгі мөлшерде айыппұл салу (2024 жылы 11 миллион теңгеден аса - еск.) немесе 3 жылға дейін бас бостандығынан айыру/бас бостандығын шектеу жазасы қарастырылады. 

Бұған дейін Ерлан Ғазымжанов өзіне қатысты қоқан-лоққыларға байланысты полицияға арыз жазғанын мәлімдеген еді.

Бишімбаев ісі бойынша судья Айжан Құлбаева да осындай жағдайға тап болған. Сәуірде экс-министрдің ісі бойынша сот отырысында Құлбаева қорқытуларға байланысты уақытша қорғауға алынған еді.

Ішкі істер министрлігі мәліметінше, 407-баптың 1-бөлігі ("Сот төрелігіне және сотқа дейінгі тергеп-тексеруге кедергі жасау" - еск.) бойынша тергеу жалғасып жатыр. Басқа ақпарат жарияланбайды.

Бұл қылмыс 2 мың АЕК (2024 жылы 7,3 миллион теңге * еск.) мөлшерінде айыппұл салу немесе 2 жылға дейін бас бостандығынан айыру/бас бостандығын шектеумен жазаланады.

Instagram парақшамызға жазылып, ең қызықты ақпараттарды бірінші болып оқыңыз!