Тау-тау болып үйіліп жатыр: Жамбыл облысында қоймаларда мыңдаған тонна пияз шіріп жатыр

Жамбыл облысында мыңдаған тонна пияз қоймаларда шіріп жатыр, - деп хабарлайды Massaget.kz тілшісі "КТК" телеарнасына сілтеме жасап.

Өйткені көкөністің бұл түріне сұраныс азайған. Сондай-ақ, өңірде пиязды бүлдірмей сақтайтын тоңазытқышпен жабдықталған қойма жоқ. Енді жаз бойы еңбектенген шаруалар тау болып үйілген өнімдерін қоқысқа тастауға мәжбүр.

Биыл 20 гектар жерге соқа салған жамбылдық диқан - Нұрмамед Зулупов. Ол мың тоннадан аса өнім жинаған. Ол биылғы науқанда пияздан пайда көрмей, кеткен шығынды да ақтай алмағанын айтып отыр.

Диқандар тіпті жалға алған қоймалардың да қаражатын таба алмай отыр. Өйткені құны түсіп кеткен көкөністі 10-15 теңгеден де ешкім сұрамайды. 

"Пайда түгілі, шығынның өзін шығара алмай отырмыз. Кредиттен-кредит, қарыздан-қарыз. Сөздің ашығы сол, не істерімізді өзіміз білмей жүрміз. Егуге қорқып қалдық. Немен егесің, қойманың ақшасын бере алмай жатырмыз. Әлі химикаттың ақшасын бермеген жерлер бар. Олар ақшасын талап етіп жатыр. Осындай болатынын кім білген?" - дейді Нұрмамед Зулупов.

Биыл елімізде миллион тоннадан аса пияз жиналған. Оның басым бөлігі Жамбыл облысынан. Ал ішкі сұраныс орта есеппен 315 мың тонна. Қазір Жамбыл облысында 138 мың тонна пияз өтпей тұр. Ал қазақстандық пияздың басты тұтынушысы саналатын Пәкістан да биыл сұранысты күрт азайтқан. Енді ауыл шаруашылығы министрлігі шығынға батқан шаруаларға көмектесудің амалын қарастырып жатыр. Ведомство мәліметінше, қазір пиязды өткізетін жаңа нарық іздестіріліп жатыр.

Instagram парақшамызға жазылып, ең қызықты ақпараттарды бірінші болып оқыңыз!