Тоқаев Олжас Бектеновтің кандидатурасын қолдады

Президент Қасым-Жомарт Тоқаев Олжас Бектеновтің премьер-министр кандидатурасын қолдады, - деп хабарлайды Massaget.kz тілшісі.

"Конституцияның 44-бабының 3-тармақшасына сәйкес Қазақстанның премьер-министрі лауазымын тағайындауға келісу үшін Олжас Абайұлы Бектеновтың кандидатурасын Мәжілістің қарауына ұсынамын. Бұл кандидатураны әуелі AMANAT партиясы ұсынды. Мен онысен келістім. Олжас Бектенов – тәжірибелі мемлекеттік қызметші. Оның Қазақстан экономикасына және басқа да салалар бойынша білімі мол, ұйымдастыру қабілеті жоғары, өзі тәртіпті, адал, еңбекқор азамат", - деді Президент. 

Бектенов туралы не белгілі: 43 жаста, мамандығы - заңгер

Еске салайық, бүгін Amanat фракциясы премьер-министр қызметіне Олжас Бектеновті ұсынған болатын. 

Айта кетейік, Олжас Бектенов 1980 жылы 13 желтоқсанда Алматы қаласында туған.

Қазақ мемлекеттік заң академиясын (2001 ж.) үздік бітірген, мамандығы "Заңгер".

ІІ дәрежелі "Айбын" (2014 ж.) және "Даңқ" (2021 ж.) ордендерімен наградталған.

2002-2005 жылдары Алматы қаласы Әділет басқармасы бөлімінің бас маманы.
2005-2006 жылдары ҚР Премьер-Министрі Кеңсесінің заң бөлімінің сарапшысы, бас сарапшысы.

2006-2009 жылдары ҚР Президенті Әкімшілігінде жұмыс жасады.

2009-2012 жылдары ҚР Әділет министрлігінің Тіркеу қызметі және құқықтық көмек көрсету комитеті төрағасының орынбасары.

2012-2014 жылдары ҚР Экономикалық қылмысқа жəне сыбайлас жемқорлыққа қарсы агенттігінің (қаржы полициясы) орталық аппаратында департамент бастығы.

2015-2016 жылдары Астана қаласы әкімінің аппарат басшысы, ҚР Президенті Әкімшілігі Басшысы Хатшылығының меңгерушісі.

2016-2017 жылдары Сыбайлас жемқорлыққа қарсы іс-қимыл Ұлттық бюросының (Сыбайлас жемқорлыққа қарсы қызмет) Астана қаласы бойынша департаментінің басшысы.

2017-2018 жылдары Ақмола облысы әкімінің орынбасары.

2018-2019 жылдары Қазақстан Республикасының Мемлекеттік қызмет істері және сыбайлас жемқорлыққа қарсы іс-қимыл агенттігі Төрағасының орынбасары.

2019-2022 жылдары Қазақстан Республикасының Сыбайлас жемқорлыққа қарсы іс-қимыл Агенттігі Төрағасының бірінші орынбасары.

2022 жылдың ақпанынан 2023 жылдың сәуіріне дейін Қазақстан Республикасының Сыбайлас жемқорлыққа қарсы іс-қимыл агенттігінің төрағасы қызметін атқарды.

Артынша 2023 жылдың сәуірінен бастап Президент Әкімшілігінің Басшысы болды. 

Өзекті жаңалықтарды өз уақытында оқу үшін Facebook парақшамызға жазылыңыз!