Адам адамды өзіне ұқсастықтары үшін жақсы көреді

Бексұлтан Нұржекеұлы әйелдер психологиясына тереңінен қанық. Жазатын тақырыбы да көбінесе сол нәзік жандарға арналады. Әйелдер тақырыбын жазу қиынның қиыны. Жай ғана әйел затын емес, өмірден өткен өнегелі әйелдердің үлгілі іс-қылығын жазады. "Бір әйелдің құпиясы" кітабынан алынған, қанатты сөзге айналған үзінділерді қабыл алыңыз.

Өсек деген – осы күнгі фольклор, оның да өмірде өз ролі бар.
* * *

Әйел шіркіннің ылғи болмаса да, анда-санда күйеуінің сөзіне құлақ асып қойғаны дұрыс. Әйелдің әйел екенін ұмытпай жүруі де жауапкершілік.

* * *

Арызды қазақта әділдік іздегендерден гөрі қызғанған, көре алмаған, қастық ойлаған адамдар көбірек жазады.

* * *

Махаббат ұстаз да екен: құмарлы қызығы, сарғайтқан сағынышы, ауыр мұңы адамды әр саққа үйретеді.

* * *

Бәлкім, білу үшін сұрағанның айыбы жоқ шығар, бірақ маған сұрақ қою деген кей жағдайда сұғанақтық, зорлық сияқтанады. Айтуға тиістісін адамдар бір-біріне былай-ақ айтпай ма?

* * *
Он жеті жас дегеннің не екені әлі есіңізде шығар: өлең де өлең,
өзің де өлең – бәрі өлеңге айналып кеткен кез ғой.
* * *
Қызғаныш та кісісіне қарай: біреуді қырсыққа, біреуді жақсылыққа жетектейді.
* * *
Әйел ешқашан алданбайды, алданып қалғансиды.
* * *
Қылмысты нәпсі істесе, шындықты жүрек істейді.
* * *
Адам адамды өзіне ұқсастықтары үшін жақсы көреді.

* * *

Күнделікті өмірде бәріміз де бір-бір халықтың бөлшегі екенімізді ұмытып кетеміз. Қалай жүрем десем, солай жүрем; қалай сөйлесем өз еркім, менде кімнің қандай жұмысы бар, өзіме өзім қожамын деп тасыраңдап, әрқайсымыздың бітім-болмысымыздан халық, халықтың қасиеті, беделі құралатынын, бет-бейнесі аңғарылатынын ескермейміз.