Үсік шалса не істеу керек?

Қаңтар қайтты, ақпан келді, бірақ әлі де аяз бар. Сынап бағанасы күндіз де, түнде де -13 -15 градустан төменді көрсетіп тұр. Осындай сақылдаған сары аязда сыртта жүріп аяқ-қолыңызды үсік шалса, не істеу керек?

– Ескеретін жайт, үсіп қалған денеңізді қармен немесе қолғап, шарф секілді өзге де заттармен ысқыламаңыз. Ол теріңізге едәуір зақым келтіріп, инфекция түсіруі мүмкін.

– Спирт немесе май жағудың қажеті жоқ. Спирт денені бірден қыздыруы мүмкін, ол домбыққан жерге мүлдем кері әсер етеді.

– Жылынуды жәймен бастаңыз. Егер де бірден ыстық суға салсаңыз, ол теріңізге зақым келтіреді. Алдымен жылы суды қосып, ақырындап температурасын көтеру қажет.

– Үсіп қалған денені дәкемен орап қойыңыз. Ол жылу береді және инфекция түсуден сақтайды.

– Белгілі бір үскен жерді ғана емес, бүкіл денеңізді жылытыңыз. Ең қарапайым түрі көрпеге оранып, бір-екішыны шәй ішіңіз.

– Зақымданған аймақтың қайта үсіп қалуына жол бермеңіз. Қайта домбығудың салдары әлдеқайда қауіпті болуы мүмкін.

Дайындаған: Әбдіманап Нұржан