Әлемдегі қала тұрғындарының 80 пайызы ластанған ауамен тыныс алады

Жер бетінде қала тұрғындары 80 пайыздан астамы қалыптан тыс ластанған ауамен демалады. Бұл туралы Дүниежүзілік денсаулық сақтау ұйымының (ДДСҰ) жаңа баяндамасында айтылды. Оның авторлары табысы орта және төмен елдерде ауа сапасы нашарлап бара жатқанын айтып дабыл қақты.

ДДСҰ осы баяндаманы әзірлеу барысында әлемдегі жүзден астам мемлекеттің 3 мыңдай қаласындағы ауа сапасын тексеріп шықты.

Табысы төмен немесе орташа елдердегі 100 мыңнан астам тұрғыны бар қалалардың 98 пайызында ауаның сапасы халықаралық талаптар бойынша ұйғарымды ластану деңгейіне жауап бермейтіні белгілі болды. Ауқатты елдердің ішінде қалалардың 56 пайызының тұрғындары ластанған ауамен тыныс алады.

«Ауаның ластануы – адамдардың ауруға шалдығуы және мезгілсіз өлімнің басты себебі.  Қаладағы ауа қатты ластанса, ол жастарға, қарияларға және жағдайы төмен жандарға залалын тигізеді»,– деді ДДСҰ  бас директорының көмекшісі Флавия Бустрео.

Еуропа және Америка, сонымен қатар, Тынық мұхитының батыс бөлігіндегі аймақтағы кей елдердің ауасы таза саналады. Сапасы нашар ауа Шығыс Жерорта теңізі аймақтары мен Оңтүстік Шығыс Азия бөлігінде таралып жатыр.   

Сарапшылардың айтуынша, ауа сапасының жақсаруы халық ауруын емдеуге кететін шығынды азайтады.

Дереккөз: inform.kz