Әлемдегі ең биік ғимараттың құрылысы басталды

Қазірдің өзінде ең биік ғимарат Дубайда орналасқан, ал 2020 жылы бұл қалада тағы бір алапат құрылым бой көтермек. Ол қазіргі алпауыттан 100 метрге биік болады.

Бүгінгі күнде ең биік ғимарат —  2010 жылы Дубайда ашылған 828 метрлік «Бурдж-Халифа». Құрылым ішінде қонақүй, ресторан, пәтерлер, мекемелер мен сауда үйлері шоғырланған. Әлемдегі ең биік көру алаңы оның 148-ші қабатында 555 метр биіктіте орналасқан. 

Бірақ жақын болашақта «Бурдж-Халифа» көшбасшы қатарынан қалатын түрі бар, өйткені, осы қазан айында Дубай-Крик аумағында жаңа ғимарат құрылысы басталды. 928 метр болатын алпауыт бүкіләлемдік Экспо-2020 көрмесінің алдында ашылады деп жоспарланып отыр.

Құрылысқа жалпы саны $1 млрд қаражат жұмсалады. Жоба аясында белгілі испан архитекторы, мүсіншісі, көптеген футуристік құрылыстар авторы Сантьяго Калатрава жұмыс істейді.