Шөппен емделуге байланысты кеңестер

Шөппен емдеу ғылымы қазір медицинада «фитотерапия» деп аталып жүр. Олай болса, денсаулыққа пайдалы 5 түрлі шөп туралы мәлімет ұсынамыз.

Лаванда. Латын тілінен аударғанда «жуу» деген мағынаны білдіреді. Ежелгі гректер мен римдіктер оны сабын жасау үшін пайдаланған, қазіргі кезде де ол көптеген сабын, сусабын және иіссулардың құрамында бар. Бұл өсімдік дене тазалығынан басқа мидың қалыпты жұмыс жасауына да пайдалы. Лаванданың хош иісі эмоциялық қысымнан айығуға, бас ауруынан арылуға және ұйқысыздықпен күресуге көмектеседі. Орамалдың шетін лаванда майымен сулап, жастықтың астына салып қойса, ұйқыға байланысты қиындықтар болмайды. Ежелгі Римде лаванданың ғажайып әсерлері туралы бұрыннан білген, оны кешкі жуыну алдында ваннаға қосқан. Егер күніңізді қатты ашуланумен өткізген болсаңыз, онда лаванда эфир майының бір тамшысын білегіңізге жағып қойыңыз. Содан кейін өзіңізді жақсы сезініп қаласыз.

Жанжабіл (имбирь). Көне Үнді жерінде жанжабілді өте қатты бағалаған. Жанжабіл көне қытай медицинасында қолданылған көптеген дәрілердің құрамына кірген. Жанжабіл гүлшанағының түрі иілген болып келеді. Өсімдіктің атауы да соған сәйкес, санскрит тілінен аударғанда «мүйіз сияқты» деген мағынаны білдіреді. Жанжабіл шайы көптеген қиындықтарды шешеді: ас қорытуды жақсартады, іш ауруын басады және зат алмасуға көмегін тигізеді. Сонымен қатар, иммунитетті күшейтіп, тұмауды басады. Жанжабіл шайын жасаудың реті мынадай: 4-5 см жанжабіл кесегін қиып алып, тазалап, тураңыз. Су ысытып, жанжабіл қосып (1 литр суға), 10 минут ішінде қайнатыңыз. Содан кейін сүзіп алыңыз. Жанжабілдің әсерін күшейту үшін кішкене қара бұрыш, даршын, лимон және бірнеше қасық итмұрын шәрбатын қосуға болады. 

Жалғасы бар...

Дайындаған: Гүлнұр Бақытбекова

Сурет: supersadovod.ru, asiaspices.ru