Ботқаның пайдасы

Балалық кезден ботқаға деген жаман көзқарасыңыз сақталып қалды ма? Оны өткен шақта қалдырып, дәмді де пайдалы ботқаны өз рационыңыздың ажырамас бөлігі етіңіз. 

Денсаулығын күтетін, өзінің келбетіне көңіл бөлетін кез келген адам біледі: таңғы ас - күні бойына күштің көзі. Ал ботқа - таңғы астың ең дұрыс нұсқасы. Әлі де ботқа жей алмайтындарға оны сүйікті ас қылуға 5 себеп айтайық.

1. Күштің көзі. Кез келген ботқа өте калориялы таңғы ас. Таңменен істеріңіз көп болса, бүл сіз мүшін мінсіз таңғы ас болмақ. Дәнді дақылдардың калориялығы 320-350 ккал (100 граммда), ал ботқаның калориялығы оның мәзіріне, дайындалу жолына байланысты болады. Мысалға мәзірде неғұрлым су көбірек болса, соғұрлым калориялығы аз болады. Керісінше құрамында май, қант көп болған сайын, энергетикалық құндылығы да өседі.
2. Үнемдеу. Ботқа - арзан тағамдар қатарынан. Таңғы асқа қымбат азық-түліктерді қолданбай, сондай-ақ дәрумендер мен микроэлементтердің тегін топтамасын қабылдайсыз. Барлық дәндер құрамында В тобының дәрумендері мен РР дәрумені, темір, кальций, мырыш, кремний және басқа көптеген ағзаға қажет заттар бар. 
3. Пайда. Әлбетте ботқа өте пайдалы. Кез келген диетаның құрамында ботқа бар. Ал сұлы жармасын асқазаны жарақаттанған науқастарға береді. Ботқа жиі жейтін тағамыңыз болсын, сонда гемоглобиніңіз жоғары, қан тамырларыңыз берік, жүрек пен асқазаныңыз мықты болмақ.
4. Арықтау. Артық салмақ - әр қызды бір рет болса да ойландырған мәселе. Түрлі диеталарды қойып, оданша ботқаны күнде жейтін тағамға айналдырыңыз. Ботқадағы күрделі көмірсулар мен клетчатка қарыныңызды ұзаққа тойдырып, аштық сезімін жояды. Демек артық жеп қоймайсыз. 
5. Депрессияға қарсы. Диетолог мамандардың айтуынша, күнделікті таңғы асқа ботқа жейтін адамдар басқаларға қарағанда стресстерге төзімділігі жоғары, жалпы көңілдері жақсырақ болады. 

Дайындаған: Сания Аринова

Сурет: fox-megan.ru